Нийслэлийн онцгой байдлын газраас гол, усны ослын нөхцөл байдал болон урьдчилан сэргийлэх арга хэмжээний талаар мэдээллээ. 

Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй

Улсын хэмжээнд он гарсаар өнөөдрийн байдлаар 8 удаагийн усны ослын дуудлага бүртгэгдэж, Онцгой байдлын байгууллагын алба хаагчид 4 хүний амь насыг аварсан.  Усны осол нь иргэдийн анхаарал болгоомжгүй, хайхрамжгүй байдал, бага насны хүүхдээ хараа хяналтгүй орхих, согтууруулах ундаа хэрэглэсэн үедээ гол, ус руу орох, зориулалтын бус хөвөгч хэрэгсэлтэйгээр гол усанд орсноос үүдэлтэй байна.

Нийслэлийн хэмжээнд он гарснаас хойш гол усны ослоор амь насаа алдсан том хүн болон хүүхэд одоогоор байхгүй байна. Харин гал түймрийн улмаас 8 хүн галд амь насаа эрсдэж, 13 хүн түлэгдэж гэмтсэн байна. 

Мөн цаг уурын байгууллагын ирүүлсэн мэдээгээр ихэнх нутгаар 30 градус давж халах төлөвтэй байна.

Иймд та бүхнийг: 

• Иргэд усны ослоос урьдчилан сэргийлж, гол, мөрөн нуурын ойролцоо амарч зугаалахдаа сонор, сэрэмжтэй байх,
• Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах,
• Согтууруулах ундаа хэрэглэсэн үедээ гол усанд орохгүй байх,
• Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэхийг анхааруулж байна.