Энэ сарын 7-9-ний өдрүүдэд стратегийн команд штабын сургуулийг зохион байгуулахтай холбогдуулан Онцгой байдлын ерөнхий газар, нийслэлийн Засаг даргын тамгын газар хамтран өнөөдөр хэвлэлийн хурал хийж, мэдээлэл өглөө. 

ОБЕГ-ын дэд дарга, бригадын генерал Б.Ууганбаяр 

Маргааш буюу зургаадугаар сарын 7-ноос эхэлж гурван өдрийн турш үргэлжлэх энэхүү үйл ажиллагаанд Ерөнхийлөгч өөрийн биеэр оролцох хөтөлбөртэй.

ОБЕГ-ын Онцгой байдлын ажиллагааны удирдлагын төвийн байранд зохион байгуулна. Өнөөдрийн байдлаар бэлтгэл ажил 99 хувийн биелэлттэй байна Гамшгийн голомтод үүрэг гүйцэтгэх, олон улсын жишиг загварыг нэвтрүүлэх, турших, ослын удирдлагын тогтолцоо, баг бүрэлдэхүүний сургуулилалт зохион байгуулна. Дээд түвшиндээ энэ үйл ажиллагаанд бодлогын дэмжлэг үзүүлэх чиглэлээр улсын УОК, ҮАБЗ, Засгийн газар, Ерөнхийлөгч гэсэн тогтолцоотой байна. 

Стратегийн команд штабын сургуулийн гол зорилго нь газар хөдлөлтийн гамшиг тохиолдсон үед төрийн байгууллага, цэргийн байгууллагууд хоорондын хамтын ажиллагаа, бүх шатны төлөвлөлтийн бичиг баримтыг шинэчлэх юм.

Онцгой байдлын ажиллагааны удирдлагын төвд гамшгаас хамгаалах албад, яам агентлаг, төрийн цэргийн байгууллагын 295 албан хаагч 72 цагийн хугацаанд сургалтыг тасралтгүй явуулна. Мөн сургалтын үйл ажиллагаанд 21 аймагт ослын удирдлагийн баг бүрэлдэхүүн ажиллана. Нийт 2900 гаруй алба хаагч ажиллахаар урьдчилсан байдлаар төлөвлөсөн байна. 

Сургуулийн бодлогын хүрээнд нийслэлийн зургаан дүүрэгт газар хөдлөлтийн гамшгийн голомтод эрэн хайх, аврах, гал унтраах, эрүүл мэндийн тусламж үзүүлэх, тэсэрч дэлбэрэх  болон химийн хорт бодисыг аюулгүй болгох мэргэжлийн ангийн дадлага сургуулийг зохион байгуулна.

Зургаадугаар сарын 8-ны өдөр орон даяар 16:00 цагт зарлан мэдээллийн дохиогоор иргэд нүүн шилжих дадлага сургуулийг зохион байгуулна. Нийслэл хотын хэмжээнд 192 цэг талбайг бэлтгэсэн. Энэ цэгт орон гэрээсээ, байгаа газраасаа аюулгүй газарт шилжин очих дадлага сургуулийг хийх гэж байна.