АТГ-аас Боловсролын зээлийн сан, Нүүрсний хулгайн хэргийн талаар мэдээлэл хийлээ. 

Нүүрсний хэргийн явц байдлаар талаарх ээлжит мэдээллийг Мөрдөн шалгах хэлтсийн 2-р албаны дарга, ахлах комиссар Б.Батбилэг өглөө. 

Нүүрсний хэргийг шалгах ажлын хэсэг өнгөрсөн зургаан сарын хугацаанд эд мөрийн баримтыг илрүүлэх, бэхжүүлэх зорилгоор 252 объектод нэгжлэг хийж, хүний биеийн эд зүйл, баримт бичигт үзлэг хийх ажиллагааг 1801 удаа, гэрчээр 11 мянга 30 хүнээс мэдүүлэг авч 180642 баримт материалыг холбогдох байгууллагаас гаргуулан авсан бөгөөд нийт 68 хэрэгт мөрдөн шалгах ажиллагаа явуулсан. Үүнээс 75 холбогдогчтой найман хэргийн мөрдөн шалгах ажиллагааг дуусган шүүхэд шилжүүлж, 18 холбогдогчтой хоёр хэргийг анхан шатны шүүхэд шийдвэрлэсэн. 

Одоогоор 24 яллагдагчид холбогдох нэг хэрэг шүүх дээр, 33 яллагдагчид холбогдох таван хэрэг прокурорт хянагдаж байна. Мөн хоёр хэргийг нэгтгэн, есөн хэргийг хааж шийдвэрлэсэн байна. 

Шалгалтын явцад 124 иргэн, албан тушаалтанд эрүүгийн хэрэг үүсгэн яллагдагчаар татсан. Үүний 55 нь эрх мэдэл, албан тушаалаа урвуулан ашиглаж бусдад хохирол учруулсан. Хахууль авах хэрэгт 56, хахууль өгөх гэмт хэрэгт 29, мөнгө угаах, үндэсгүйгээр хөрөнгөжих хэрэгт 23, худал мэдүүлэг өгөх гэмт хэрэгт эрүүгийн хэрэг үүсгэн яллагдагчаар татсан. 

Нийт яллагдагчдын 81 хувь нь нийтийн албан тушаалтан, мөн улс төрд нөлөө бүхий УИХ-ын гишүүн 7, МУ-ын Ерөнхийлөгчийн тамгын газрын дарга асан 1, Зам тээврийн сайд асан 1, Төрийн нарийн бичгийн дарга асан 1, аймгийн ИТХ-ын дарга 1, аймаг сумын засаг дарга 3, УИХ-ын гишүүний зөвлөх 1, гаалийн улсын байцаагч 20, хил хамгаалах байгууллагын 5, АТҮТ-ийн 4, нийгмийн даатгалын байцаагч 1, боомтын захиргааны албаны мэргэжилтэн 2, хуулийн этгээдийн албан тушаалтан 15, иргэн 28 тус тус шалгагдсан байна.