Ээжүүдийн төлөөлөл хүүхдийн мөнгийг ялгаваргүй олгох асуудлаар өнөөдөр Хөдөлмөр нийгмийн хамгааллын сайд С.Булгантуяад шаардлага хүргүүллээ.

Шаардлага хүргүүлсэн ээжүүдийн төлөөлөл: Миний хувьд хүүхэдтэйгээ хоёулахнаа амьдардаг. Хүүхдийн мөнгөнөөс хасагдсан. 11-11 төв рүү байнга гомдол өгч байгаа ч ХНХ-аас хариу өгөхгүй байна. Нэгдүгээр сарын 14-нд хасагдсанаасаа хойш миний хувьд нийгмийн халамжийн үйлчилгээ зайлшгүй шаардлагатай өрхийн гишүүний тодорхойлолт аваад  холбогдох газруудаас явж байна. Хороо бүх мэдээлэл хэвийн, анх сарын 10 сая төгрөгийн цалинтай гэж бүртгэгдсэн байсан. Үүнийг 1 сая төгрөг гээд засварлуулсан

Шаардлага хүргүүлсэн ээжүүдийн төлөөлөл: Хүүхдийн мөнгөнөөс хасагдсан 9000 гаруй ээжүүдийг төлөөлөөд явж байна. Хөдөлмөр нийгмийн хамгааллын яамны гадаа зургаа дахь удаагаа ирж байна. УИХ хуулиа баталсан. Засгийн газар хуулиа л хэрэгжүүлдэг байгууллага гэж хариу хүргүүлсэн. Бид Үндсэн хуулийн Цэцэд өргөдөл гаргасан. Дунд суудлын хуралдаан тодорхойгүй хугацаагаар хойшилсон. Шинээр томилогдсон С.Булгантуяа сайдад өнөөдөр хоёр асуудлаар шаардлага хүргүүлж байна. 

Нэгдүгээрт, 9 хувь гээд ялгасан байгаа нь зөвхөн цалингийн орлоготой ганц, хоёрхон хүүхэдтэй ихэвчлэн өрх толгойлсон ээжүүдийн хүүхдүүд болон хөгжлийн бэрхшээлтэй хүүхдүүдийг хассан байна. Зайлшгүй хүүхдийн мөнгө олгогдох шаардлагатай хүүхдүүдийн мөнгийг олгохдоо 1,2,3,4,5 сарын мөнгийг нөхөж олгох

Хоёрдугаарт, 91 хувьд ямар хүмүүс багтсан бэ гэх мэдээллийг нийтэд ил болгох гэх хоёр асуудлаар шаардлага хүргүүлж байна. Ипотекийн зээлтэй хүн улсын хэмжээний 9 хувьд багтахаар баян байна гэж байхгүй.

ХНХЯ-ны Төрийн захиргаа удирдлагын газрын дарга Батсайхан ээжүүдийн шаардлагыг хүлээн авлаа. Тэрбээр "Өнгөрсөн жил эдийн засгийн нөхцөл байдлаас шалтгаалан хүүхдийн мөнгийг 91 хувьд олгох шийдвэр гарсан. Харин одоогоор УИХ, Засгийн газраас манай яаманд хүүхдийн мөнгийг 100 хувь олгох асуудлаар чиглэл өгсөн. Ажлын хэсэг гарсан. Төсвийн асуудал Сангийн яаман дээр шийдэгдэнэ. Салбар яамны зүгээс хүүхдийн мөнгийг 100 хувь олгох чиглэлд Сангийн яамтай хамтраад ажиллаж байна" гэлээ.