ДБЭТ-ын уран бүтээлчид цалингаа нэмэгдүүлэх шаардлагыг Соёлын яаманд хүргүүлэхээр тайван жагсаал хийж эхэлсэн. Уран бүтээлчид соёлын яамны байрны гадаа очиж эсэргүүцлээ илэрхийлсэн. Энэ үеэр соёлын сайд Ч.Номин засгийн газарт хуралтай байсан тул уран бүтээлчидтэй 13:00 цагийн үед дуурийн театрын үзвэрийн танхимд өөрийн биеэр уулзалт хийнэ гэж хэлсэн боловч яамны төлөөлөл болсон хүмүүсээ явуулаад өөрөө цагтаа ирсэнгүй. Товлосон цагаасаа хоёр цагийн дараа ирсэн соёлын сайд соёл урлагийн төлөөлөлтэй уулзалт хийлээ. 

Соёлын сайд Ч.Номин 

Соёлын яам байгуулагдсан цагаас хойш цалин хөлсний асуудал маш их яригдсан. Өнөөдрийн засгийн газрын хуулиар  Алслагдмал газар ажиллаж байгаа соёл урлагийн чиглэлээр ажиллаж байгаа 3002 хүнд  таван жилийн хугацаанд ажилласан хүнд зургаан сартай тэнцэх хэмжээний мөнгөн тэтгэмжийг нэг удаа олгох журам батлагдсан.

 
Соёлын салбарын 452 байгууллагын 6245 ажилтан албан хаагчдын цалин 570-995 мянган төгрөгийн хооронд байна. Дундаж цалин 760 байгаа нь бусад БШУ-ны байгууллага, төрийн байгууллагуудаас 6-25 хувь бага байна. Соёлын яам байгууллагдсан цагаасаа хойш соёлын салбарынхны цалинг 25 хувь нэмэгдүүлсэн ч бусад салбаруудтай харьцуулахад бага. Иймээс онд ондоо багтаагаад соёлын салбарынхны цалинг Боловсролын салбарынхантай дүйцүүлэн нэмнэ" хэмээв.

Соёл урлагийн төлөөллүүд 

Наадам хүртэл бидний цалинг 1 сая 500 мянган төгрөг болгохгүй бол соёлын сайд та өөрөө эртнээс монгол бүжиг дуугаа сурч эхлээрэй. Хамт олныхоо төлөө дуугарсныхаа төлөө дээд албан тушаалтандаа хараалын үгээр загнуулаад суусан. Залуучууд өнөөдөр туйлдаж байна. Монгол оронд соёлыг үнэлэх үнэ цэнэ алга. Бид яамтай болох сургаар маш их зүйл хүлээсэн. Гэтэл боловсролын яамнаас л дор байна шүү дээ. Бид цалингаа нэмэгдүүлэхийг шаардсаар байгаа ч тодорхой үр дүнд хүрэхгүй байгаа" хэмээн байр сууриа илэрхийллээ. 

Ц.Наранцацрал