Улсын Гуравдугаар Төв Эмнэлэг 2014 оноос АНУ-ын “ВИРТУ” Сантай хамтран ажиллаж байна. Энэ хамтын ажиллагааны гэрээний хүрээнд АНУ-ын Гэгээн Барнабасын Гэмтлийн төв эмнэлгийн мэдрэлийн мэс заслын тасгийн эрхлэгч мэдрэлийн мэс засалч Реза Яссари тэргүүтэй тархи нуруу нугасны мэс заслын зочин профессорийн баг иржээ. 

Америкийн зочин профессорын баг 05 сарын 14-нөөс 28-ны өдрүүдэд  зайлшгүй гадаад улсад эмчлүүлэх шаардлагатай байгаа 30 гаруй эмчлүүлэгчид нарийвчилсан үзлэг оношлогоо хийж, эпилепсийн эмгэг голомт авах зэрэг тархи, нурууны мэдрэлийн мэс заслын тусламж үйлчилгээг тус эмнэлгийн мэдрэлийн мэс заслын багтай хамтран хийж байна. Мөн хамтарсан ажлын байрны болон танхим хосолсон сургалтуудыг зохион байгуулж тус эмнэлгийн мэдрэл, мэдрэлийн мэс заслын тусламж үйлчилгээний чадавхийг сайжруулан бэхжүүлэхэд мэргэжил арга зүйн зөвлөгөө өгч байна.

Энэ удаагийн зочин профессорын багт Эпилепсийн эмгэгийн үеийн сэтгэл зүйч эмч хамт ирсэн бөгөөд эпилепсийн эмчилгээ хийлгэж буй эмчлүүлэгч, тэдгээрийн ар гэрийн хүмүүст сэтгэл зүйн тусламж үзүүлэхэд эмч мэргэжилтнүүдийг чадавхижуулах юм.