УИХ-ын гишүүд энэ долоо хоногт тойрог тойрогтоо ажиллаж байна. Тэд Засгийн газраас өргөн мэдүүлсэн Үндсэн хуулийн нэмэлт өөрчлөлтийн төслийг ард түмэнд тайлбарлан таниулах үүрэг авч, ийнхүү долоо хоногт тойрог тойргийн зүг хүлгийн жолоо залсан. 

Засгийн газрын өргөн барьсан  Үндсэн хуульд оруулах өөрчлөлтийн төсөлд иргэдийг төлөөлөх парламентын чадамжийг сайжруулах зорилгоор Улсын Их Хурлын гишүүдийн тоог 152 болгон хүн амын тоотой уялдуулан нэмэгдүүлэхээр, нийт гишүүний тавин хувийг мажоритар, тавин хувийг пропорционал аргаар сонгох буюу сонгуулийн холимог тогтолцоог нэвтрүүлэх зохицуулалтыг тусгасан юм. Энэхүү заалт олон нийтийн зүгээс шүүмжлэл дагуулж байгаа ч УИХ-ын дарга Г.Занданшатар захирамжаар гишүүд тойрогтоо ажиллаж, Засгийн газраас өргөн мэдүүлсэн Үндсэн хуульд оруулах өөрчлөлтийн төсөл, түүний хэлэлцэх эсэхийг хэлэлцэн шийдвэрлэсэн талаар иргэд, сонгогчдод танилцуулж, байр суурийг нь сонсож байна.

Гишүүд ирэх долоо хоногт иргэдийн саналыг нэгтгэж, нэгтгэсэн тайлан мэдээгээ энэ сарын 17-ны дотор Төрийн байгуулалтын байнгын хороонд хүргүүлэх юм. Улмаар  тус Байнгын хороо иргэдийн саналыг нэгтгэн Үндсэн хуульд оруулах өөрчлөлтийн төслийг хоёр, гурав дахь хэлэлцүүлэгт бэлтгэх үүрэг бүхий Ажлын хэсэгт 18-ны дотор хүргүүлэх үүрэг буй. 

Ийнхүү ирэх долоо хоногоос МАН-ын үнэмлэхүй олонхийг бүрдүүлж байгаа парламент Үндсэн хуулийн нэмэлт өөрчлөлтийн төслийг хэлэлцүүлгийг хийж эхлэх нь ээ. 

П.ГОО