Иргэд “Эрдэнэс Тавантолгой” ХК-ийн 1,072 хувьцааны ногдол ашгаа шаардаж гарын үсэг цуглуулах талаар иргэдийн төлөөллөөс мэдээлэл хийлээ. 

Г.Хажидмаа: Өнөөдөр монгол улсын нийт хүн амын 75 хувь нь нэн ядуу болсон байна.  Дэлхийд баялагаараа наймд ордон ард түмэн тэр чигтээ ядуурал руу живчихсэн байна. 

2022 оны аравдугаар сараас эхлэн нүүрсний хулгайтай холбоотойгоор ногдол ашгийг иргэдэд яаралтай өгөх нь зүй ёсны хэрэг юм хэмээн шаардлага өгч эхэлсэн. Шаардлага өгснөөс хойш он гарсны дараа ногдол ашгийг өгөхөөр судалж байгаа хэмээн хариу ирсэн боловч албан ёсны мэдээ мэдээллийг засаг төрөөс гаргахгүй байгаа учраас иргэдийн зүгээс өдөр бүр ногдол ашгийг шаардаж байна.

Монгол Улсын үндсэн хуульд олгогдсон эрхийнхээ дагуу эрдэнэс баялгаасаа 50+1 хувийг монголын ард түмэн авч байх ёстой. Гэтэл төрд сууж байгаа төрийн түшээд нам харгалзахгүй нэгдээд бидний баялгийг хулгайлж байна. Засгийн газар иргэн болгонд хоёр сая төгрөг өгөх боломжтой, дөрвөн сард ногдол ашгийг хуваарилна гэж хэлсэн ч хэлсэн амандаа хүрсэнгүй. Иймд 2023 оны тавдугаар сарын 2-ноос эхлээд миний бие Г.Хажидмаа болон ахмадуудын төлөөлөл, иргэдийн төлөөлөл хамтраад суулт зарласан. Мөн бид өнөөдрөөс ногдол ашиг авах хүсэлтэй иргэдийн гарын үсгийг төрийн ордны баруун талд цуглуулж сууна" гэсэн юм.