Үндсэн хуулийн өөрчлөлтийн талаар ХҮН-аас өнөөдөр /2023.05.01/ мэдээлэл хийлээ. Тус намын дарга, УИХ-ын гишүүн Т.Доржханд “Монгол Улс маш том өөрчлөлтийн ирмэг дээр байгаа”-г тодотгов.

Тэрбээр “Өнгөрсөн 30 жилд бүтээсэн үр дүн, өнөөгийн авлига, эдийн засгийн уналт, иргэдийн ядуурлыг өөрчлөх суурийг тавьж чадах уу, үгүй юу гэдэг ирмэг дээр байна. Тогтолцооны өөрчлөлт хийж, эдийн засгийн үр ашигтай улс байж чадах уу, иргэд нь өөртөө итгэлтэй үндэстэн болж чадах уу. Эсвэл ядуу буурай, өрөндөө баригдсан дэлхийн 100 улсын араас орох уу гэдэг сонголтын ирмэг дээр байна.

ХҮН-ын Төлөөлөх зөвлөлийн хурлаар “Үндсэн хуулийн нэмэлт өөрчлөлтийг нь хийх нь зүйтэй” гэдэгт 100 хувь санал нэгдсэн. Бусад намуудын удирдлага бас дэмжсэн.

Монгол Улс түүхэндээ анх удаа улс төрийн намуудын дийлэнх нь санал нэгтэйгээр Үндсэн хуулийн нэмэлт өөрчлөлтийг хийх зарчмын тохиролцоонд хүрсэн.

Үндсэн хуулинд нэмэлт өөрчлөлт хийх асуудлыг энэ долоо хоногт эхлүүлэхгүй бол цаг байхгүй. Хамгийн багадаа 45 хоног шаардлагатай. 45 хоногийн дараа Сонгуулийн хуулийг хэлэлцэж, батлах ёстой. Үүнийг 06 дугаар сарын 20-ноос өмнө хийх ёстой” гэсэн байр суурийг илэрхийлж, Үндсэн хуулийн нэмэлт өөрчлөлтийг яаралтай хэлэлцэх хэрэгтэйг хэллээ.

ХҮН-ын хувьд УИХ-ын гишүүний тоог 152 болгох саналыг дэмжиж буй аж. 

Б.Хэрлэн