"Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаан өнөөдөр долоо дахь өдрөө үргэлжилж байна. Уг хэрэгт буруутгагдан, шүүгдэж буй УИХ-ын гишүүн Ё.Баатарбилэг мэдүүлэг өглөө. 

Тэрбээр "Шүүгдэгч Ё.Баатарбилэг миний бие дараах мэдүүлгийг гаргаж байна. АТГ-аас 2022.04.22-ны өдөр дуудсан, надаас өмнө нь нэг ч удаа мэдүүлэг авалгүйгээр шууд яллагдагчаар татах тогтоол танилцуулсан. Энэ хугацаанд АТГ-т 10 гаруй удаа биечлэн очиж, шаардсан материалыг өгч, мөрдөх байгууллагын шаардлагыг биелүүлж ирсэн. 2022.11.03-ны өдөр АТГ-аас надад холбогдуулан хэргийн материалыг танилцуулсан хуудсанд гарын үсэг зуруулсан.

Өнгөрсөн хугацаанд УИХ-ын гишүүний дархан, бүрэн эрхээр хаацайлалгүйгээр жирийн иргэний хувиар хууль шүүхийн байгууллагын шаардлагыг ёсчлон биелүүлж ирсэн. Сүрхий дарамтад оруулдаг юм билээ, амаргүй цаг хугацаа байлаа. Дуудсан цагт нь очоод байхад мэдэгдэх хуудас өгөөд байдаг. 

Хуулийн байгууллагаас надад хоёр зүйл ангиар эрүүгийн хэрэг үүсгэж, шалгасан. Нэгдүгээр, үндэслэлгүй хөрөнгөжсөн, хоёрдугаарт НВЦ компанид давуу эрх олгоход нөлөөлсөн байж болзошгүй гэсэн хэрэгт буруутгасан. 

УИХ-ын гишүүн Ё.Баатарбилэг намайг хөрөнгө орлого их хэмжээгээр буюу 388 сая төгрөгөөр нэмэгдсэнийг тайлбарлаж чадахгүй байгаа гэсэн. Би 2007 онд АТГ анх байгуулагдсан цагаас ХОМ-ээ бөглөөд явж байгаа. 2007 онд Улаанбаатарт хоёр ширхэг орон сууц, нэг жийп машинтай гэж мэдүүлж байсан. Одоо 15 жилийн дараа миний үндсэн хөрөнгө хоёр орон сууц, нэг жийп машин байна. 

Хэрэгт хохирол нөхөн төлүүлэх, хор уршгийг арилгуулах зорилгоор гэж надад байгаа байр, машиныг битүүмжилсэн. Өөр битүүмжлэх юм байхгүй. Миний хэнд учруулсан ямар хохиролыг надаар төлүүлэх гээд байгаа юм бэ. Хохирол төлөхөөр би гахай явган, нохой нүцгэн үлдэнэ. 

...Ийм юм яриад зогсож байгаадаа ичиж байна. Өчнөөн олон жил төр засгийн ажил хийчихээд одоо ингээд юу ч үгүй царайлаад зогсож байгаадаа ичиж байна...

...Хөгжлийн банкны гэх энэ том хэргийн ард явсан бол яанаа гэх харуусал, харамсал байна, ялангуяа улстөрчид бидэнд. Хөгжлийн банктай холбоотой ямар нэг асуудал, нөлөөлөл, хууль зөрчсөн үйлдэл байхгүй" хэмээн мэдүүллээ.