Яруу найрагч Ц.Хулан болон түүний хамсаатан Б.Отгонбаатар нарт холбогдох шүүх хурал өнөөдөр БЗД-ийн анхан шатны шүүхэд товлогдсон байв. Гэвч шүүх хуралдаан хойшилж магадгүй гэх мэдээллийг холбогдох албаны хүн өгч байна. 

Учир нь энэ хэрэг нь улсын нууцад хамаарах учраас шүүх хурлыг хаалттайгаар анхан шатны шүүхийн ерөнхий шүүгч даргалах явуулдаг. Харин Ерөнхий шүүгч  "Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаанд оролцож байгаа юм. Иймээс өглөө товлогдсон шүүх хурал хэзээ болох нь тодорхойгүй байна.

Сануулахад,  нийслэлийн Прокурорын газраас яллагдагч Ц.Хулан, Б.Отгонбаатар нарыг Эрүүгийн хуулийн тусгай ангийн 19.4 дүгээр зүйлийн 1 дэх хэсэгт зааснаар /Гадаадын тагнуулын алба, байгууллага, иргэнтэй хууль бусаар хамтран ажилласан/ эрүүгийн хэрэг үүсгэж, яллагдагчаар татан, яллах дүгнэлт үйлдэж ирүүлсэн /12 хавтаст/ хэргийг шүүх 2023 оны гуравдугаар сарын 21-ний өдөр хүргүүлсэн. 

Яллагдагч Ц.Хулангийн өмгөөлөгч Л.Өлзийхүү, Д.Оюунбаатар нараас хэрэгт нэмэлт мөрдөн шалгах ажиллагаа хийлгэх, хэргийг прокурорт буцаалгах тухай хүсэлт ирүүлснийг шүүх 2023 оны дөрөвдүгээр сарын 12-ны өдрийн 11 цагт урьдчилсан хэлэлцүүлгийн шүүх хуралдаанаар хянан хэлэлцсэн юм. Яллагдагч Ц.Хулангийн өмгөөлөгч нараас гаргасан хүсэлтийг шүүх хүлээн авахаас татгалзаж, яллагдагч Ц.Хулан, Б.Отгонбаатар нарыг шүүхэд шилжүүлэх нь зүйтэй гэж үзсэн учраас ийнхүү шүүхэд шилжүүлсэн байгаа. Харин тэдэнд авсан таслан сэргийлэх арга хэмжээ хэвээр үргэлжилж байгаа билээ.