Оросын Омскийн оршин суугчид болох Владимир Сергеев болон Антон Жучков нарт 8-10 жилийн хорих ял оноожээ. Тэднийг алан хядах ажиллагаанд бэлтгэсэн хэрэгт буруутай хэмээн үзсэн талаар ВВС агентлаг мэдээлсэн байна. 

Эх сурвалжийн мэдээлснээр, дээрх иргэд Москвад болсон, Украин дахь дайныг эсэргүүцсэн арга хэмжээний үеэр цагдаагийн машиныг шатаах зорилготой байсан гэж мөрдөн байцаагчид үзжээ. Дайн эсэргүүцсэн арга хэмжээний үеэр тэднийг баривчлах үед тэд амиа хорлохоор завдсан гэнэ. 

Тухайн үед хийн баллонтой холбосон канистр, амсарт нь шүдэнз бэхлэсэн архины шил тэдний цүнхнээс олдсон гэж цагдаагийн протоколд бичсэн байна. Тэд баривчлагдах үедээ сэтгэцэд нөлөөлөх эм хэтрүүлэн хэрэглэсэн байсан нь амь насанд нь аюул учруулж, тэднийг баривчилсны дараа эмнэлэг рүү хүргэсэн аж. 

Цагдаагийнхан тэднийг цагдаагийн баривчилгаанд зориулагдсан машиныг шатаахыг завдсан хэмээн буруутгасан ч Жучков хэнийг ч хохироох гээгүй, харин "Украины дайн, Донбасс дахь үйл явдлыг харахгүйн тулд амиа хорлохыг хүссэн" хэмээн мэдүүлжээ. Түүнчлэн тэрбээр цөмийн дайн гарч болзошгүй хэмээн айж байсан гэж мэдүүлсэн байна.

Г.Бямбасүрэн