ШИНЭ намын удирдлагууд төр, нийгмийн нэрт зүтгэлтэн С.Зоригийн хөшөөнд хүндэтгэл үзүүллээ. Энэ үеэр тус намын дарга, УИХ-ын гишүүн асан Ж.Батзандан "С.Зориг агсан бол Монголын эрх чөлөө, ардчилал, хүний эрхийн бэлгэ тэмдэг болсон агуу удирдагч. Монголын үндэсний удирдагч гэж бид үздэг. 

Монголын ардчилал, эрх чөлөөний манлайлагчийн амь насыг хороогоод, жирийн ардын хүүхдүүдийг хэлмэгдүүлэх гэж оролдсон бузар хэрэг өчигдөр төгсгөл боллоо. С.Зориг агсны амийг хөнөөсөн хүмүүст хуулийн хариуцлага тооцох нэг өдөр ирнэ гэдэгт үргэлж итгэдэг. С.Зориг агсныг хороож, Монголын ардчиллыг хөнөөх гэж оролдсон нөхөд үнэнд гүйцэгдэж байна" хэмээн ярилаа.

Харин өөрийг нь шалгаж буй хэргийн талаар тэрбээр "Намайг мафи, МАНАН бүлэглэлийн эсрэг тэмцсэн гэж шоронд хорьсон. Ж.Батзанданг 461-д 61 хоног хорьж, хоёр сарын өмнө сулласан. Удахгүй надад холбогдох хэрэг хэрэгсэхгүй болно. МАНАН мафийн эсрэг, Монголын шударга ёсны төлөө тэмцсэн учраас Ж.Батзандан ялах болно. Надад холбогдуулан шалгаж байгаа хэргүүд ор үндэсгүй, худал гүтгэлэг гэдэг нь удахгүй тогтоогдож, цагаадна гэдэгтээ бүрэн итгэлтэй байна" гэсэн тайлбарыг өглөө. 

Б.Хэрлэн