Лхагва гарагийн үдэш Украины нийслэл Киевт, тэнгэрт тод цагаан гэрэл гялбажээ. Үүний шалтгаан нь юу байсан нь тогтоогдоогүй, харин Украины цэргийнхэн хиймэл дагуул эсвэл солир унасантай холбоотой гэж мэдэгдэж байгаа юм.

ВВС агентлагийн мэдээлснээр, хурц цагаан өнгийн гэрэл гялбуулсан, унаж буй объектыг Киевийн оршин суугчид олж харжээ. Энэ явдлын дараа агаарын түгшүүрийн дохиог зарласан байна.

Украины Ерөнхийлагчийн захиргааны тэргүүн мэдэгдэл хийхдээ үүнийг Украины пуужингаас эсэргүүцэн хамгаалах системийн ажиллагаатай холбоотой хэмээн мэдэгдэж байв. "Үл танигдах нисдэг биет гэж бүү сандар. Энэ бол манай пуужингаас эсэргүүцэн хамгаалах систем" гэж Андрей Ермак телеграм сувагтаа бичсэн байсан ч удалгүй энэ постоо устгажээ.

Харин Киев хотын цэргийн захиргаа хурц гэрлийг НАСА-ийн сансрын хиймэл дагуул унасантай холбон тайлбарласан байна.

"Дөрөвдүгээр сарын 19-ний 22.00 цаг орчимд Киев орчимд тэнгэрт агаарын объектын хурц гэрэл ажиглагдсан. Урьдчилсан мэдээллээр, энэ нь НАСА-ийн сансрын хиймэл дагуул дэлхийд унаснаас үүдэлтэй гэрэл. Хиймэл дагуулын хэлтэрхий газарт унаснаас үүдэн хүний амь насанд аюул учруулахгүйн тулд агаарын түгшүүр зарласан. Пуужингаас эсэргүүцэн хамгаалах систем ажиллаагүй" гэж захиргааны дарга Сергей Попко мэдэгджээ. Харин НАСА өөрийнх нь хиймэл дагуул унасан гэсэн мэдээллийг няцаасан юм.

Хурц гэрэл гарсан үзэгдлийн шалтгааныг тогтоогоогүй байгаа ч энэ нь Оросын цохилттой холбоогүй гэдэгт Украины цэргийнхэн итгэлтэй байгаа бололтой. Энэ үйл явдлын дараа Украины Зэвсэгт хүчний Агаарын цэргийн хүчний хэвлэлийн алба мэдээлэхдээ, хиймэл дагуул эсвэл солир унаснаас үүдэн хурц гэрэл гарсан байж болзошгүй гэдгийг онцолжээ. 

Мөн одоогоор Киев чиглэлд Орос агаарын дайралт хийх аюул занал одоогоор байхгүй, агаараас эсэргүүцэн хамгаалах систем бэлэн байдалд байгаа гэж Агаарын хүчин мэдэгдсэн байна.

Олон нийтийн сүлжээн дэх реакци

Украин НАСА-ийн хиймэл дагуулаас үүдэлтэй гэрэл гэж мэдэгдэж, НАСА харин гэрэл гарах үед хиймэл дагуул сансарт байсан хэмээн Украины цэргийнхний мэдэгдлийг няцааж байх үеэр Украины олон нийтийн сүлжээний хэрэглэгчид энэ сэдвээр олон наргиа, меме хийжээ. Тэдний ихэнх нь Үл танигдах нисдэг биет гарч ирсэнтэй холбон наргисан байна.