Хятадын Шанхай хот 26,3 сая хүн амтай, энэ хэрээр нийтийн тээврийн үйлчилгээ сайтар хөгжсөн ч энэ хотынхон автобус тээвэр сонгох нь улам багасчээ. Энэ талаар Жэнминь жибао сонин мэдээлсэн байна. 

Эх сурвалжийн мэдээлснээр, Шанхайд автобусаар өдөр бүр зорчих зорчигчдын тоо 4,1 сая болж буурчээ. Харин 2017 онд энэ үзүүлэлт зургаан саяд дөхөж байсан гэнэ. Шанхай хотын иргэдийн ихэнх нь метрог сонгох болсны улмаас автобусаар зорчих хүмүүс эрс ховордож, автобус тээврийн компаниуд алдагдалд орж байгаа аж. 

Автобус компаниуд алдагдалд орох болсон нь зорчигчгүй болсон, төрөөс үзүүлдэг тэтгэмж буурсны дээр Хятадын нүүрсхүчлийн хийтэй тэмцэх стратегийн хүрээнд автобусны паркийг шинэчлэх шаардлагатай болсон нь ихээхэн нөлөөлжээ. Улмаар автобус тээврийн компаниуд дампуурч болзошгүй гэж мэргэжилтнүүд үзэж байгаа бөгөөд шинэ чиглэл гаргаж, дагуул хотууд руу автобус явуулбал алдагдлаа нөхөж магадгүй аж. 

Г.Бямбасүрэн