Оросын ерөнхий боловсролын сургуулийн дөрөвдүгээр ангийнханд зориулсан "Хүрээлэн буй ертөнц" сурах бичгийн шинэ хэвлэлтэд Киевийн Русь орны түүхий тухай бүлэгт Киевийн тухай хэсгүүдийг хасчээ. Энэ талаар Медиазона мэдээлсэн байна. 

Хуучин сурах бичигт "Цаг хугацааны тууж" цадигт Киев-Печерийн сүмийн санваартан Несторын тухай бичсэн байсан бол шинэ хэвлэлтэд Несторыг аль сүмд харьяалагдаж байсныг нь бичилгүй ердөө л санваартан хэмээн оруулжээ. Түүнчлэн 2021 оны сурах бичигт Владимир тайж бүх ард түмнийг Киевт загалмайлсан хэмээн бичсэн байсан бол шинэ номонд "нийслэлд" хэмээн өөрчлөн оруулжээ. Мөн "Киеви Олегийг таалал төгссөний дараа Игорь тайж удирдах болов" гэсэн өгүүлбэрийг "Олегийг таалал төгссөний дараа Русийг Игорь тайж удирдах болов" хэмээн өөрчилсөн байна. 

Зургадугаар ангийн Оросын түүхийн сурах бичгийн 2016 оны хэвлэлтэд "Олег Новгород болон Киевийг нэгтгэсэн 882 оныг түүхчид Эртний Оросын төрт улс үүссэн он гэж үздэг" гэсэн мөр байсныг 2023 оны хэвлэлтэд Киев гэсэн нэршлийг мөн л хасжээ.

Эх сурвалжийн онцолсноор, шинэ "Хүрээлэн буй ертөнц" сурах бичиг хэвлэлтэд шилжсэн, одоогоор худалдаанд гараагүй байгаа гэнэ. Түүнчлэн Оросын түүхэн дэх Киевийн үүрэг оролцоог өөрчилсөн сургалтын материалуудыг ч бэлдэж байгааг Медиазона мэдээлсэн байна. Украинтай холбоотой хэсгүүдийг сурах бичигт аль болох цөөлөх ажил 2014 оноос л эхтэй гэнэ. Улмаар өнгөрсөн жил дайн эхэлснээс хойш сурах бичгийн редакторууд түүхийн номд байх текстийн 15 орчим хувийг хасах шаардлагатай болсон аж.

Г.Бямбасүрэн