ОХУ Украинд дайн дэгдээсний улмаас дэлхийн олон орны хоригт өртөж, хориг тавьсан орнуудыг "нөхөрсөг бус орон" гэсэн жагсаалтад оруулан, харин хоригт нэгдээгүй орнуудыг "нөхөрсөг" гэсэн жагсаалтад багтаасан. Ийм нөхөрсөг орнуудтайгаа харилцаагаа авч үлдэхийн тулд төрөл бүрийн нөлөөллийн ажил хийж байгаагийн дээр хөрш зэргэлдээ орших орнуудад болж буй улс төрийн болон иргэний нийгмийн салбарын үйл явдлыг анхааралтай ажиглах болсон юм. Тиймдээ ч манай улсад гарч буй жагсаал цуглаан, дайн эсэргүүцсэн хөдөлгөөний талаар Оросын хэвлэлүүдээр тогтмол гарсаар байна. Энэ удаад Буриадын Улсын их сургуулийн Дорно дахины дээд сургуулийн захирал Владимир Родинов infpol.ru сонинд ярилцлага өгөхдөө "тусгай цэргийн ажиллагаатай холбоотойгоор Оросыг шүүмжилдэг хүчин Монголд бий" хэмээн ярьжээ. Тэр дундаа No War хөдөлгөөнийг онцолсон байна. 

"Энэ хөдөлгөөнийг үндэслэгчдийн нэг нь Ардчилсан намын гишүүн Д.Монголхүү. Тусгай цэргийн ажиллагаа эхэлсэн цагаас л тэр Оросыг буруутгасаар ирсэн. Зарим гишүүд нь тусгай цэргийн ажиллагааны санхүүжилтэд холбоотой гэж үзсэн Монголын иргэдийн жагсаалтыг АНУ-ын элчин сайдын яаманд ч аваачиж өгч байсан" хэмээн тэрбээр ярьжээ.

Энэ ярилцлагадаа тэрбээр No War хөдөлгөөний зохион байгуулагчдын нэг Э.Одбаярын талаар ч ярьсан байна. 

"Ардчилсан намын дарга С.Эрдэнийн хүү болох Э.Одбаяр 2021 оны эсэргүүцлийн жагсаалуудаар олонд танигдсан. Тэр дундаа ковидын эсрэг хязгаарлалтын үеэр Наадам зохион байгуулахыг эсэргүүцсэн No Naadam, эрх мэдлээ хэтрүүлэн ашиглаж байгаа гэж Монгол Ардын Намыг буруутгасан No double Standart гэсэн жагсаалуудад оролцож саатуулагдаж байсан юм" хэмээн  Владимир Родионов ярьжээ.

Мөн Монголын Ардчилсан нам хоёр хэсэг хуваагдсан хэмээсэн байна.

"Нэг талд нь Монголын Ерөнхийлөгч асан Ц.Элбэгдорж, Улаанбаатар хотын дарга асан Э.Бат-Үүл, No War хөдөлгөөний тэргүүн Д.Монголхүү нар, нөгөө талд нь Монгол Улсын Ерөнхийлөгч асан Х.Баттулга болон Оросыг илтэд шүүмжилдэггүй түүний дэмжигчид байгаа" хэмээн  Владимир Родионов ярьжээ. 

Түүнчлэн 2022 оны тавдугаар сарын есний өдөр Х.Баттулга Зөвлөлт Холбоот Улсын маршал Георгий Жуковын хөшөөнд цэцэг өргөж байсныг онцолсон байна. 

"Яг энэ үед барууны хэвлэлүүдээр Оросын эсрэг мэдээлэл ид өрнөж байсан юм. Мөн Жуковын хөшөөг буулгах санал санаачилга болон бусад шаардлагууд нь Монгол дотроос биш харин гаднаас өгсөн зааварчилгаа" хэмээн тэрбээр онцолжээ. 

Владимир Родионов хэвлэлд өгсөн ярилцлагадаа Монголын нутгаар дамжин өнгөрөх хийн хоолойн сэдвээр ч ярьсан байна. Түүний өгүүлснээр зарим улс төрч, нийгмийн зүтгэлтнүүд  энэ хоолойг үндэсний аюулгүй байдал, нутаг дэвсгэрийн бүрэн бүтэн байдалд заналхийлнэ гэж үздэг аж.

"Ийм хандлагатай хүмүүс нийгэмд маш цөөн. Олон нийтийн үзкэл бодлыг харахад хийн хоолойг эсэргүүцэж байгааг дэмжих нь цөөн. Барууныг баримталсан зүтгэлтнүүд л ийнхүү эсэргүүцдэг. Тэдний дунд Монгол Улсын Ерөнхийлөгч асан Ц.Элбэгдорж бий. Тэр саяхан Киев, Бучад очиж, Зеленскийн дэглэмийг дэмжиж байгаагаа илэрхийлсэн" хэмээн тэрбээр ярьсан байна.

Үүний зэрэгцээ Монголын хэвлэл мэдээллийн салбарт барууны медиа ихээхэн үүрэг гүйцэтгэдгийг онцолжээ.

"Монголын хэвлэл мэдээллийн хэрэгслээр Оросын эсрэг чиглэгдсэн контент дүүрэн. Тэд бүгд л барууны хэвлэлүүдээр гарсан мэдээллийг л хуулбарлан нийтэлдэг. Монголын хувийн мэдээллийн хэрэгслүүд нь өндөр албан тушаалын улс төрчид болон бизнесменүүд эзэмшилд байдаг. Нэг талаас тэд нийгэмд нөлөөлдөг ч нөгөө талаас Монголд хэвлэл мэдээлэлд итгэх итгэлийн түвшин бага байдаг" хэмээн Родионов өгүүлжээ.

Г.Бямбасүрэн