Украинд дайн эхэлснээс хойш Санкт-Петербургийн улсын их сургуулийн математик, компьютерийн ухааны факультетын багш нарын 50 хувь нь ажлаас халагджээ. Энэ талаар "Яндекс"-ийн захирал байсан Елена Бунина T-Invariant сонинд ярьсан байна.

Түүний өгүүлснээр, их сургуулиас хаалгдсан багш нарын ихэнх нь хилийн чанад руу боловсролын салбарт, эсвэл зүгээр программистаар ажиллахаар явсан гэнэ. Мөн орос оюутнууд ч, тэр дундаа төгсөх ангийн оюутнууд хилийн чанадыг зорих төлөвлөгөөтэй байгааг тэрбээр онцолжээ.

Оросын шилдэг их дээд сургуулиудаас багш нар олноор халагдах үзэгдэл Украины дайны дараагаас эхэлсэн юм. Тэр дундаа Эдийн засгийн дээд сургуулийн Москва, Петербургийн салбаруудад багш нар олноор халагдсан гэж Republic сонин мэдээлжээ. Эх сурвалжийн онцолсноор, боловсролын хөтөлбөр, лабораториудын туршлагатай удирдагчид бүгд Оросоос явж, харин саяхан зэрэг цол хамгаалсан хүмүүс тэдний орыг залгах болсон байна. Эдийн засгийн дээд сургуулийн профессор асан Константин Сонины өгүүлснээр, энэ сургуулиас нийтдээ 150 гаруй багш халагдаж, гадаад орныг зорьжээ.

Өнгөрсөн онд Орост дайчилгаа зарласан нь их дээд сургуулийн ажилтнууд олноор хилийн чанадыг зорих явцыг түргэсгэсэн байна. Оюутан, аспирантууд дайчилгаанаас чөлөөлөгдөх үндэслэлтэй бол багш нарт ийм боломж байдаггүй аж. Ингээд Оросын их дээд сургуулиудын багш нар гадаад орныг зорьж, боловсон хүчний хомстолд орж эхэлжээ.

"Проект" хэвлэлийн мэдээлснээр, дайны улмаас өндөр ур чадвартай багш нар төдийгүй эрдэмтэд ч Оросоос явсан байна.  Scholars at Risk  гэх ганц байгууллага л Оросоос 200 эрдэмтнийг гаргасан бол Александр фон Гумбольдтын сан 62 эрдэмтнийг гадны орон руу зуучилжээ. 

Г.Бямбасүрэн