Украин сөрөх давшилт хийхээр бэлдэж байгаа энэ үед Херсон мужийн Оросын талын эрх баригчид нутгийн оршин суугчдын тээврийн хэрэгслийг армийн хэрэгцээнд зориулан хурааж эхэлсэн талаар The Moscow Times сонин мэдээлжээ.

Оросын цэргүүдийн эзэлсэн нутгийн оршин суугчдаас 30 завь хүчээр хураан авсан гэнэ. Кремлиэс томилогдсон, Херсон мужийн захирагч Владимир Сальдогийн мэдэгдсэнээр, энэ мужид дайны үеийн дэглэм үйлчилж байгаа, энэ үеэр эрх баригчид "армийн хэрэгцээнд зориулан техник хэрэгслийг татах  эрхтэй" гэнэ. 

"Армийг бага флотын нэмэлт хэрэгсэл, өөрөөр хэлбэл завиар хангахын тулд хэд хэдэн захвийг хураасан. Ойролцоогоор 30 завь хураасан" гэж Сальдо мэдэгджээ. Мөн "хэсэг хугацааны дараа" завийг нь эргүүлж өгөх эсвэл нөхөн төлбөр олгоно хэмээн амласан гэнэ.

Оросын Ерөнхийлөгч Владимир Путин өнгөрсөн оны 10 дугаар сард эзлэгдсэн нутгуудад дайны байдал тогтоосон юм. Ийм дэглэм тогтоосон үед орон нутгийн эрх баригчид өмч хөрөнгө хураахын дээр бүсийн хилийг хаах, олон нийтийн арга хэмжээ зохион байгуулахыг хориглох зэрэг хязгаарлалтын олон арга хэмжээ авч хэрэгжүүлэх эрхтэй болсон юм. 

Г.Бямбасүрэн