Украины Гадаад хэргийн сайд Дмитрий Кулеба Багдад айлчлах үеэрээ Украин, Оросын хоорондын хэлэлцээрт зуучлагчаар оролцох Иракийн саналд татгалзсан хариу өгчээ. Энэ талаар DW агентлаг мэдээлсэн байна. 

Эх сурвалжийн мэдээлснээр, Оросын тал Украины нутгаас цэргээ гаргаагүй нөхцөлд Украин энхийн хэлэлцээрт оролцох бодолгүй байгаагаа илэрхийлжээ. Орос улс сөргөлдөөнд л тэмүүлж байгаа нь энхийн хэлэлцээр хийх замд гол саад болж байгаа хэмээн Кулеба онцолсон байна. 

Өмнө нь Иракийн эрх баригчид Орос, Украины хоорондын хэлэлцээрт туслахад бэлэн хэмээн удаа дараа мэдэгдэж байлаа. Ирак улс "хоорондоо сөргөлдөөнтэй харицлаатай байгаа улс орнуудын харилцааг зохицуулах туршлагатай", "энхийн манаанд зогсоход бэлэн" гэж Иракийн Гадаад хэргийн сайд Фуад Хусейн мэдэгдэж байв. Түүнчлэн дайн үргэлжлүүлэх нь энэ хоёр орон төдийгүй дэлхий дахинд аюултай хэмээн тэрбээр онцолжээ. 

Г.Бямбасүрэн