АНУ-ын Кентукки мужийн Лиусвилл хотод хүмүүс рүү буудсан хэрэг дахин гарсны дараа The Guardian сонин галт зэвсэг ашиглан үйлдсэн гэмт хэргийг хайхрамгүй өнгөрч боломгүйг харуулсан цочирдом судалгааны баримтыг нийтэлжээ. Ердөө гурван өдрийн өмнө Луисвилл хотод болсон халдлага нь сүүлийн сард галт зэвсэг ашиглан бусад руу халдсан 15 дахь, харин энэ онд гарсан 146 дахь хэрэг аж.

АНУ-д зэвсэг чөлөөтэй эзэмшихтэй холбоотой асуудал байнгын маргаан дагуулсаар ирсэн. Статистикийн мэдээлэлд дурдсанаар, АНУ-д оршин суугчдаас нь их зэвсэг байдаг гэх бөгөөд 323 сая хүнд 400 сая буу оногдож байгаа гэнэ. 

Түүнчлэн сүүлд хийсэн судалгаагаар, Америкийн таван хүн тутмын нэг нь гэр бүлийнхээ гишүүнийг сумны шархнаас болж алдсан хэмээн хариулжээ. Үүнд галт зэвсэг ашиглан амиа хорлосон тохиолдлууд ч багтсан байна. Мөн судалгаанд оролцсон хүмүүсийн 20 хувь нь буугаар сүрдүүлсэн тохиолдолтой учирж байсан гэж хариулсан бол АНУ-ын зургаан иргэн тутмын нэг нь буудалцааны гэрч болж байсан гэж хариулжээ. 

Африк болон латин гаралтай америкчуудын дунд энэ үзүүлэлт бүр цочирдом байгаа гэнэ. Судалгаагаар, арьсны цөөнхүүдийн гурван хүн тутмын нэг нь ойр дотны хүнээ сумны шархнаас болж алджээ. Мөн ийм тооны хүн гудамжны буудалцааныг харсан гэж хариулсан байна.

Г.Бямбасүрэн