Тагнуул хийсэн хэрэгт сэжиглэгдсэн Оросын 15 дипломатыг хөөх шийдвэр гаргаснаа Норвегийн эрх баригчид зарлажээ. Энэ тухай мэдээллийг ВВС агентлаг дамжуулсан байна. 

ОХУ Элчин сайдын яамаа "нууц тагнуулын үйл ажиллагаа"-ы зорилгоор ашиглахыг Норвеги улс хүлээн зөвшөөрөхгүй гэж Норвегийн Гадаад хэргийн сайд Анникен Хюитфельд мэдэгджээ. 

 

Энэ нь Орос улс өнгөрсөн онд Украин руу түрэмгийлснээс хойш Оросын дипломатуудыг олноор нь хөөж байгаа анхны тохиолдол биш юм. Өмнө нь олон орон мөн ийм шалтгаанаар Оросын дипломатуудыг нутгаасаа гаргаж байлаа.

Үүний хариуд ОХУ ч мөн ижил хариу арга хэмжээ авч байсан бөгөөд энэ удаад ч "ОХУ зохих хариуг өгнө" хэмээн Оросын Гадаад хэргийн яам мэдэгдсэнийг ТАСС агентлаг дамжуулжээ.

Ройтерс агентлагийн мэдээлснээр, Норвегийн эрх баригчид Оросын дипломатуудыг "персоно нон грата" буюу "тааламжгүй этгээд" гэж зарлахаасаа өмнө удаан хугацаанд дипломатуудыг ажиглаж байсан гэнэ. Улмаар дипломатуудын чухамхүү ямар үйлдэл тагнуул хийж байгаа хэмээн сэжиглэх үндэслэл болсон талаар мэдээлээгүй ч тэднийг ойрын үед Норвегийн нутгаас явахыг шаарджээ.

Г.Бямбасүрэн