Засгийн газрын өчигдрийн хуралдаанаар Шувуу ажиллагааг эрчимжүүлж, олон нийтийн оролцоог нэмэгдүүлэх зорилгоор мөнгөн урамшуулал олгох шийдвэр гарчээ. Энэ талаар Хуульзүй, дотоод хэргийн сайд Х.Нямбаатар өнөөдөр мэдээлэл хийлээ.
Тэрбээр “Гэмт хэрэг үйлдээд, хэрэг бүртгэлт, мөрдөн байцаалтын шатанд оргон зайлж, гадаад улсад ажиллаж, амьдарч байгаа хүмүүсийн талаар 11-11 төвд өгсөн мэдээлэл батлагдсан тохиолдолд тухайн иргэнийг 10 000$-аар урамшуулах шийдвэр гарсан” гэдгийг хэллээ.
Мөн Шувуу ажиллагаа хэрхэн үргэлжилж байгаа талаар мэдээлэл өглөө. "Унгар улсаас иргэн Төгсбаяр хэргээр шалгуулахаар өөрөө ирсэн. Тэрбээр эрүүгийн хуулийн тусгай ангийн 22.1.2-т заасан хэрэгт шалгагдаж байгаа. Мөн БНСУ-аас иргэн Болортуяа өөрөө мөрдөгчтэй холбогдож, ирээд хэргээ шалгуулж байна. Энэ хүмүүст хилийн хориг тавьсан байгаа.
Ойрын үед БНСУ-аас хэд хэдэн хүнийг албадан ирүүлэхээр Солонгосын хууль хяналтын байгууллагатай хамтран ажиллаж байгаа"-г ХЗДХ-ийн сайд мэдээллээ.
Б.Хэрлэн
| Уншиж байна |