Украины зэвсэгт хүчнийг бэхжүүлэх, НАТО-ийн ажиллагааны төлөвлөгөө зэргийг багтаасан нууц баримтууд өнгөрсөн долоо хоногт олон нийтийн сүлжээнд цацагдсан. Энэ нууц баримтуудыг илчилсэн хүн ажиллаж байсан цэргийн бааз дээрээсээ эдгээрийг олсон гэж ярьсан талаар Вашингтон Пост сонин нууц материалууд дэлгэгдсэн Discord чат группийн гишүүнээс  авсан эх сурвалжтайгаар мэдээлжээ. 

Эх сурвалжийн мэдээлснээр, Discord платформ дээр "ихэвчлэн эрчүүд, хөвгүүдээс" бүрдсэн 20 гишүүнтэй бүлэг 2020 онд байгуулагджээ. Өнгөрсөн онд энэ бүлгийн OG гэх зохиомол нэртэй нэгэн гишүүн "хачин хэллэгээр" зурвасууд үлдээсэн ч тухайн үед үүнд хэн ч анхаарал хандуулаагүй гэнэ. Харин нэгэн гишүүн OG-ийн энэ зурвасууд нь "нууц тагнуулын баримт бичгүүдийг бараг үгчлэн тайлсан" зурвас гэдгийг анзаарсан байна. OG нэртэй гишүүн цэргийн бааз дээрээ нууц материалуудыг олоод, гэртээ аваачсан хэмээн ярьж байжээ. 

Америкийн нууц материалууд нийтэд ил болсон талаарх мэдээлэл анх энэ сарын долооны өдөр ил болж байсан юм. Эдгээр баримт бичгүүд дээр Украины Зэвсэгт хүчнийг бэхжүүлэх  НАТО-ийн төлөвлөгөөнүүдийн талаар бичсэн байжээ. Үүний араас дахин нууц материалууд дэлгэгдсэн бөгөөд эдгээр дээр Ойрх Дорнод болон Хятад дахь Америкийн үндэсний аюулгүй байдлын асуудлуудыг хөндсөн байсан гэнэ.

Г.Бямбасүрэн