УИХ-ын чуулганы хуралдаан Төрийн албан хаагчийн ёс зүйн тухай хуулийн төсөл болон хамт өргөн мэдүүлсэн хууль, тогтоолын төслүүдийн анхны хэлэлцүүлгээр үргэлжилж байна. 

Хуулийн төслийг хэлэлцүүлэгт бэлтгэх үүрэг бүхий Ажлын хэсгийн танилцуулгыг Улсын Их Хурлын гишүүн, Ажлын хэсгийн ахлагч Б.Баттөмөр танилцуулав.  

Төрийн албан хаагчийг ёс зүйн зөрчлөөс урьдчилан сэргийлэх, соён гэгээрүүлэх үйл ажиллагаа нь хуулийн төслийн чухал асуудал мөн бөгөөд энэ талаарх зохицуулалтыг шинээр нэмж байна. Төрийн албан хаагчийн ёс зүйн асуудлаарх Ёс зүйн хороо, Дэд хорооны түүний бүрэн эрхийг хуульчилж, бие даасан хараат бус зарчмаар ажиллахаар тусгалаа. Ёс зүйн хороо орон тооны тав, орон тооны бус дөрөв, нийт есөн хүний бүрэлдэхүүнтэй, Ёс зүйн дэд хороо нь байгууллагын албан хаагчийн тооноос хамааран 3-7 хүний бүрэлдэхүүнтэй ажиллахаар тусгасан. Ёс зүйн хороо нь төрийн өндөр болон түүнтэй адилтгах албан тушаалтны, Засгийн газар нь эрхлэх асуудлын хүрээний холбогдох байгууллагын удирдах албан тушаалтны, Дэд хороо нь өөрийн байгууллагын албан хаагчийн болон харьяалах доод шатны байгууллагын томилох эрх бүхий албан тушаалтны ёс зүйн асуудлаар гаргасан гомдол, мэдээллийг хянан шийдвэрлэхээр тусгалаа. Төрийн албан хаагч нь ёс зүйн зөрчил гаргасан тохиолдолд Ёс зүйн хороо болон Ёс зүйн дэд хорооны холбогдох дүгнэлтийг үндэслэн зөрчлийн шинж байдал, анх буюу давтан үйлдсэнийг нь харгалзан гомдол гаргагчид, эсхүл олон нийтийн өмнө уучлалт гуйхыг үүрэг болгох, өөрт нь ганцаарчилсан хэлбэрээр сануулах, байгууллагын албан хаагчдын өмнө нээлттэй сануулах, төрийн албанаас халах хүртэлх арга хэмжээг авахаар тусгасан.

УИХ-ын гишүүн Ц.Сэргэлэн: Төрийн албанаас чөлөөлөх үндэслэлүүдийг тодорхой заасан. Төрийн албан хаагч албан үүргээ гүйцэтгэж байхдаа архидан согтуурах, мансуурах үйлдэл гаргахыг хориглосон. Хориглосон энэ үйлдлийг төрийн албан хаагч гаргавал яах вэ гэдэг зохицуулалт байхгүй. Үүнийг хуульд суулгах боломжтой юу? 

УИХ-ын гишүүн Б.Баттөмөр: Хуулийн төслийн наймдугаар зүйлд Төрийн албан хаагчдад тавигдах нийтлэг шаардлагын 8.2.8-д Албан үүргээ гүйцэтгэж байхдаа болон ажлын байранд согтууруулах ундаа хэрэглэх олон нийтийн дэг журмыг зөрчихтэй холбоотой заалт оруулж өгсөн. 

ТАЗ-ийн Б.Баатарзориг: Ажлын байран дээрээ архидан согтуурсан үзэгдэл дээр ТАЗ эвлэрэхгүй байгаа. 2019 онд 98 зөрчил, 2020 онд 37 зөрчил, 2021 онд 75 зөрчил, 2022 онд 153 зөрчил илэрсэн. Зөрчлийн нөхцөл байдлаас шалтгаалаад албан үүргээс нь халах, төрийн албанаас чөлөөлөх хүртэлх үйл ажиллагааг явуулж байна. 

УИХ-ын гишүүн Ц.Сэргэлэн: Хориглосон заалтуудыг зөрчвөл яах вэ? гэдэг асуудал нь сахилгын шийтгэлтэй холбоотой юм. Зөрчсөн хүнийг яах вэ? Хална гэдэг заалтыг оруулж өгөх хэрэгтэй. Халах тухай асуудал тухайн байгууллагын даргын үзэмжийн асуудал болоод байна. Мансуурсан ТАХ-аар Монгол Улсын иргэн асуудлаа шийдүүлнэ гэж байхгүй. Тийм учраас шууд халдаг болох хэрэгтэй.