G7-ийн орнууд тавдугаар сарын 19-21-ний өдрүүдэд Японд уулзах үеэрээ Оросын АЛРОСА компанийн алмазад хориг тавихаар төлөвлөж байгаа талаар Энэтхэгийн Экономик Таймс сонин салбарын мэргэжилтнүүдээс авсан эх сурвалжтайгаар мэдээлжээ. 

Үнэт чулуу, гоёл чимэглэлийн эдлэлийн экспортод дэмжлэг үзүүлэх зөвлөлийн дарга Випул Шахын өгүүлснээр, 1 каратын алмазууд хоригт орох гэнэ. "Шинэ хориг тавигдана гэж бид төрөл бүрийн эх сурвалжаас сонссон, эхний ээлжинд томоохон алмазуудыг хориглох юм билээ" хэмээн тэрбээр Экономик Таймс сонинд ярьжээ.

Оросын АЛРОСА компани дэлхийн нийт алмазын үйлдвэрлэлийн 30 хувийг хангадаг бөгөөд өмнө нь АНУ, Их Британи, Канад, Австралийн хоригт орсон юм. Европын холбоо энэ компанийг хоригт багтаахаар зэхэж байсан ч Оросын алмазын салбарт цохилт өгснөөр Европт олон мянган ажлын байр үгүй болно гэсэн эсэргүүцлийн улмаас энэ төлөвлөгөөнөөсөө ухарч байв.

Г.Бямбасүрэн