Хаврын улс төр дүүргийн Засаг дарга нарыг огцруулах акцаар эхэлжээ. Хэдхэн хоногийн өмнө Баянгол дүүргийн ИТХ-ын төлөөлөгчид Засаг дарга Ө.Сумъяабаатарыг огцруулсан. Гэвч нутгийн өөрөө удирдах ёс бус нам, УИХ-ын гишүүний эрх мэдэл, ашиг сонирхол, албан тушаал ялснаар энэ асуудал намжаад байна.

Тэгвэл өнөөдөр Баянзүрх дүүргийн Засаг дарга Н.Баярмөнхийг огцруулах асуудал сөхөгдлөө. Тус дүүргийн ИТХ-ын АН-ын бүлгээс Засаг дарга Н.Баярмөнхийг огцруулахаар хөдөлжээ.

Монгол Улсын засаг захиргаа, нутаг дэвсгэрийн нэгж, түүний удирдлагын тухай  хуулиар ИТХ-ын төлөөлөгчдийн 1/3 нь гарын үсэг зурсан тохиолдолд Засаг даргыг огцруулах асуудлыг хэлэлцдэг. Баянзүрх дүүргийн ИТХ-ын 43 төлөөлөгчийн 17 нь Засаг дарга Н.Баярмөнхийг огцруулахаар санал нэгдэж, гарын үсэг зуржээ. 

ИТХ-ын төлөөлөгчид Баянзүрх дүүргийн Засаг дарга Н.Баярмөнхийн мөрийн хөтөлбөр, үйл ажиллагааны биелэлт хангалтгүйгээс гадна маш олон хууль бус томилгоо хийж, төрийн албаны хууль зөрчсөнийг хэлж байна. Мөн хуралд суудаггүй, үндсэн ажлаа мэддэггүйг төлөөлөгчид шүүмжилж, хариуцлага нэхэж байна.

Б.Хэрлэн