Төсвийн жилд хамгийн их хөрөнгө зарцуулахаар төлөвлөсөн аймаг бол Ерөнхийлөгч, Ерөнхий сайдын төрж өссөн нутаг Хэнтий аймаг.

Төсвийн жил эхэлснээс хойш хэд хэдэн сумынхаа наадмын талбайг засварлахаар тендер зарлаж, бүтээн байгуулалтын ажлаа эхлүүлээд байгаа. Тэгвэл аймгийн Засаг даргын Тамгын газрын өнгөрсөн хоёр гуравдугаар сард ямар зарлага гаргасан талаарх мэдээллийг хүргэе. Өнгөрсөн хоёрдугаар сард Хэнтий аймгийн Засаг даргын тамгын газар 10 төрлийн цалингийн зардлаас бусад таван сая төгрөгөөс дээш үнийн дүн бүхий зарлагын мөнгөн гүйлгээ хийжээ. Аймгийн аварга малчин, тариаланч, саальчин шагналын мөнгөнд 5 сая 670 мянган төгрөг, 6 сая 600 мянган төгрөгөөр нөүтбүүк,  аварга малчин цомын урьдчилгаанд 8 сая төгрөг, 0001 хэа серийн дугаартай автомашины обуд авахад 5 сая 600 мянган төгрөг, 6 сая төгрөгөөр тавилга, "Амар мэнд" контент хийхэд 6 сая төгрөг гээд 140 гаруй сая төгрөгийн гүйлгээг хийжээ.

Харин гуравдугаар сард Засаг даргын дэмжлэг гэсэн утгатайгаар 18 сая төгрөг, аварга малчин өрхийн цомын үлдэгдэлд НАЙМАН сая төгрөг, 0001 хэа автомашин сэлбэг авахад 12 сая төгрөг гээд 80 гаруй сая  төгрөгийн гүйлгээ хийсэн байна. 

П.ГОО