ОХУ Украины эсрэг дайн өдүүлж, фронт дээр бие бүрэлдэхүүний хохирол ихээр амссаныхаа улмаас өнгөрсөн оны есдүгээр сард хэсэгчилсэн дайчилгаа зарласан. Энэ үеэр цэргийн насны олон мянган эр хилийн чанадыг зорьсны дээр энэ дайчилгааг эсэргүүцсэн оршин суугчид цэргийн комиссын байрыг шатаах, галдахыг завдсан хэрэг хэдэнтээ гарсан юм. Ийм нэг хэргийг үйлдсэн сурагч охинд саяхан ял оноосон талаар "Эрх чөлөө" радио мэдээлжээ. 

Эх сурвалжийн мэдээлснээр, Казаньд өнгөрсөн оны 10 дугаар сард орон нутгийн цэргийн комиссын байрыг шатаахыг завдсан 18 настай сурагч охины холбогдсон хэргийн шүүх хурал болсон байна. Түүнийг бусдын эд хөрөнгө сүйтгэсэнд буруутай гэж үзэн хоёр жилийн тэнсэн харгалзах ял оноожээ. 

Өнгөрсөн оны 10 дугаар сарын хоёрноос гурванд шилжих шөнө сурагч охин шатамхай шингэн бүхий гурван лонхыг цэргийн комиссын байр руу шидэх гэж байх үедээ саатуулагдсан байна. Тухайн үед түүнийг гэрийн хорионд оруулсан бөгөөд шүүх хурал нь ийнхүү энэ долоо хоногт болсон байна. 

Г.Бямбасүрэн