Энэ сарын 15-ны өдөр Улаан-Үд хотод Цагаан дарь эхэд зориулсан Буриад бөхийн барилдааны олон улсын тэмцээн болох юм байна. Тэмцээний үеэр лам нар Оросын Ерөнхийлөгчийн эрүүл мэндийн төлөө ном уншина гэж Буриадын Засгийн газрын хэвлэлийн алба мэдээлжээ.

Хэвлэлийн албанаас гаргасан мэдээлэлд "Цагаан дарь эх нь Оросын удирдагчдыг ивээгч юм. Тэмцээн эхлэхийн өмнө лам нар Оросын Ерөнхийлөгч Владимир Путиний эрүүл мэнд, сайн сайхны төлөө хурал хурна" хэмээсэн байна. 

2007 оноос эхлэн зохион байгуулагдаж буй бөхийн барилдааны тэмцээнд энэ онд Өвөр Байгалын хязгаар, Эрхүү муж, Монгол, Буриадаас 700 гаруй бөх оролцож, 63 кг, 75 хүртэлх кг болон 75-аас дээш килограммын жинд барилдах аж.

Энд дуулгахад, II Екатерина хатан хаан 1764 онд Буддын шашныг Орост бүрэн эрхэт шашин хэмээн тунхаглаж, сүсэгтнүүд хамба лам зэрэг шашны тэргүүнүүдтэй байхыг зөвшөөрсөн байна. Үүний хариуд сүсэгтнүүд 1766 онд Екатерина хатан хааныг Цагаан дарь эхийн хойд дүр хэмээн өргөмжилж байжээ. Тэр үеэс хойш 1917 он хүртэл Оросын хаадыг Цагаан дарь эхийн хойд дүр гэж өргөмжлөх уламжлал үргэлжилж, орчин цагт сэргэсэн байна.

Г.Бямбасүрэн