Сүхбаатар аймгийн Эрдэнэцагаан сумын Хадын булаг багийн Уртын цагаан гэх газарт 2023 оны 04 дүгээр сарын 08-ны 11:30 цагийн үед гарсан ой хээрийн түймэр Дорнод аймгийн Матад, Халхгол суманд тархаад байна. 

Өнөөдөр өглөөний 07.10 цагийн байдлаар Халхголын сав нутгаар цас орж, цасан шуурга шуурч байна. Дорнод аймгийн Ус цаг уур, орчны шинжилгээний төвийн Үүлэнд зориудаар нөлөөлөх хоёр экспедици ажиллаж байна. Нэгдүгээр экспедици өнөөдөр өглөө Халхголын Ялалт багаас баруун өмнө зүгт 20км-т үүлэнд нөлөөлж, хур тунадасны хэмжээнд нөлөөлсөн байна. Харин хоёр дахь экспедици Халхгол сумын төвөөс баруун зүгт 20-иод км-т байрлаж байгаа аж. 

Өчигдөр Буйр нуурын баруун эрэг дагуу Булан дэрс орчимд шинээр гарсан түймрийг унтраасан байна. Мөн Чулуунхороот болон Булган сумын нутаг дэвсгэрт гарсан түймрийг унтраажээ.

Түймрийг голомтод Үндэсний аврах бригадын аврагчид, Дорнод аймгийн Онцгой байдлын газрын Шуурхай бүлэг, Сүхбаатар аймгийн Онцгой байдлын газрын албан хаагчид, тус аймгийн Эрдэнэцагаан сумын гал унтраах бүлэг, Халхгол сумын Онцгой байдлын ангийн гал унтраах бүлэг Халхгол, Матад сумдын иргэдээс бүрдсэн гал унтраах бүлгүүд, “Петро Чайна Дачин Тамсаг” ХХК-ийн ажилтнуудаас бүрдсэн нийт 300 орчим хүн ажиллаж байна.