АНУ Тайваньд үзүүлэх дэмжлэгээ нэмэгдүүлэхгүй бол дайн эхэлж болзошгүй гэж Америкийн Конгрессын сенатч Линдси Грэм  үзэж байгаа гэнэ. Түүний үзэж байгаагаар ойрын долоо хоног эсвэл сард Хятад улс арлыг бүслэхэд бэлтгэж болзошгүй аж. Тиймээс  Бээжинд газрын тос нийлүүлэхийг хязгаарлаж, АНУ-ын цөмийн пуужингуудыг шумбагч онгоцонд байршуулах хэрэгтэй гэж Грэм мэдэгджээ. 

"Хятадууд ойрын сарууд эсвэл долоо хоногуудад Тайванийг бүслэхэд бэлтгэж болзошгүй гэж би эмээж байна" хэмээн Грэм Фокс Ньюс сувагт өгсөн ярилцлагадаа өгүүлээд АНУ дэмжлэгээ сайжруулахгүй бол дайн болно хэмээн мэдэгджээ.

Түүнчлэн бүс нутаг дахь цэргийн тоогоо нэмэгдүүлж, Тайваньд нийлүүлэх зэвсгийн нийлүүлэлтийг идэвхжүүлж, цэргийн алба хаагчдыг бэлтгэх ажлаа эрчимжүүлэхийг уриалсан байна. Мөн F-16 сөнөөгч онгоц нийлүүлэх хэрэгтэй хэмээн Грэм мэдэгджээ.

Энд дуулгахад, Тайванийн тусгаар тогтнолыг дэлхийн ердөө 12 орон хүлээн зөвшөөрдөг. АНУ болон бусад орнууд "нэг Хятад" бодлогыг хүлээн зөвшөөрдөг ч Америкийн төлөөлөгчид Тайваньд айлчилж, хамтын ажиллагааг өргөжүүлснээр АНУ, БНХАУ-ын хооронд сөргөлдөөн үүсдэг юм. Хамгийн сүүлд гэхэд л Тайванийн Ерөнхийлөгч Цай Инвэнь АНУ-д айлчилсныг БНХАУ эрс эсэргүүцэн, "Нэгдсэн хурц илд" нэртэй томоохон сургуулилалтыг эхлүүлэн, Тайванийг бүрэн бүслэх аргуудыг боловсруулсан байна. 

Г.Бямбасүрэн