Орос Украины эсрэг дайн өдүүлснээс хойш дайн эсэргүүцэж байгаагаа илэрхийлсэн хүмүүсийг торгох, баривчлах, алдартнуудыг ажлаас нь халах зэргээр шийтгэсээр байгаа юм. Монголын үзэгчдэд "Гал тогоо" цувралын ахлах тогоочийн дүрээр танигдсан жүжигчин Назаров эхнэрийн хамт театраас хөөгдөж, шүүхээс торгуулийн шийтгэл сонсож байсан бол энэ удаад "Ийм нэгэн явдал" киноны нарийн бичгийн даргын дүрээр манай улсын үзэгчдэд танигдсан Лия Ахеджакова ажлаасаа халагджээ. 

"Эрх чөлөө" радиогийн мэдээлснээр, "Современник" театр Лия Ахеджакова ажлаасаа халагдсаныг баталсан байна. Театрын удирдлагын мэдээлснээр, Ахеджакова өөрийн хүсэлтээр халагдсан, дөрөвдүгээр сарын тавны өдрөөс эхлэн энэ театрт ажиллахгүй байгаа гэнэ. Жүжигчин Ахеджакова энэ театраас гарч байгаагаа өнгөрсөн сард мэдэгдэж байлаа. Түүнийг дайн эсэргүүцсэн үзэл бодолтой гэж үзэгчдээс захидал ирсний улмаас гол дүрийг нь бүтээж байсан нэгэн жүжгийг тайзнаа тавихыг зогсоож байжээ. 

Ахеджакова энэ театрт 1977 оноос эхлэн ажиллаж байгаа бөгөөд театраас халагдсан ч уран бүтээлээ үргэлжлүүлж, Орост амьдарна хэмээн мэдэгджээ.

Г.Бямбасүрэн