Боловсрол, шинжлэх ухааны салбарынхан өнөөдөр Сүхбаатарын талбайд жагслаа. Тэд цалинг 30 хувиар нэмэгдүүлэх шаардлагыг тавьж, шаардлагыг хүлээж авахгүй бол ажил хаях хэмжээнд хүртэл тэмцэхээ илэрхийлэв.

Тэгвэл Боловсрол, шинжлэх ухааны сайд Л.Энх-Амгалан багш нарын шаардлагыг зүйд нийцэхгүй байгааг хэлэв. Тэрбээр "Багш нарын цалин нэмэгдээгүй гэх асуудал байхгүй. Боловсролын салбар сүүлийн хоёр жилд цалингаа 30 хүртэл хувиар нэмсэн. Багш нарын цалинг 30 хувиар нэмэхэд бусад салбарынхан юм яриагүй. Гэтэл дахиад цалин нэмэгдүүлнэ гэдэг бол буруу ойлголт.

Үйлдвэрчний эвлэлтэй, Засгийн газар, БШУЯ гурван талт гэрээтэй. Хоёр жил тутамд гэрээгээ дүгнэдэг. Хоёр жилийн өмнө хийсэн гэрээгээр бид багш нарын цалинг 30 хүртэлх хувиар нэмж, үр дүнгийн санхүүжилтийн тогтолцоонд шилжүүлэх үүргийг хүлээсэн. Бид энэ үүргээ биелүүлсэн. Өнөөдөр багш нарын доод цалин 1 сая 5 000 төгрөгөөс эхэлж байгаа. Хамгийн дээд талд нь 2 800 000 төгрөгийн цалин авч байгаа" гэж ярив.