УИХ-ын чуулганы өнөөдрийн хуралдаанаар Төрийн албаны зөвлөлийн 2021, 2022 оны үйл ажиллагааны  тайланг хэлэлцлээ. ТАЗ-ийн тайланг чуулганы хуралдаанаар анх удаа хэлэлцсэнтэй холбогдуулан УИХ-ын дарга Г.Занданшатар Төрийн байгуулалтын байнгын хороо болон ТАЗ-д хэд хэдэн чиглэл өглөө.

УИХ-ын дарга Төрийн албаны ёсзүйн хуулийг яаралтай батлах шаардлагатайг хэллээ. Энэ тухай тэрбээр “Ингэж ёсзүйг төлөвшүүлж, хэм хэмжээ болгосны дараа хууль шаардлагагүй болно. Энэ бол төрийн албаны нэр хүндийг өргөх гэсэн хандлага.

Төрийн албаны ёсзүйн зөрчил 0.1 хувиар буурсныг сайн үзүүлэлт гэж байгаа ч үүний 75 хувь нь ажлын байрандаа архидан согтуурахтай холбоотой зөрчил байна. Архидалтаас төрийн албаны хамаг муу муухай юм эхэлж байна. Төрийн ордон, байгууллагууд дээр “Занданшатарын хар хууль” гэж нэрлэж байгаад архи, дарс оруулахаа больсон. Эргээд хавтгайрах хандлагатай болсон байна” гэдгийг санууллаа.

Мөн тэрбээр төрийн албан хаагчдын цалинг нэмж, нийгмийн баталгааг хангаж байж ёсзүйн хариуцлага шаардах ёстойг хэллээ. ОУВС-ийн тавьсан шаардлагад нийцүүлж, 180 мянгад царцаах ёстой байсан. Одоо 225 205 албан хаагчид хүрчихээд байна. Хэдэн хүний ажлын байранд хэдэн хүн ажиллаж байгаад дүгнэлт хийж, эрс шинэчлэл хийе. Ингэж байж цалинг нэмэгдүүлье. Төрийн албыг цомхон, чадварлаг болгох замаар төрийн албан хаагчдын нийгмийн баталгааг хангах хэрэгтэй байгааг хэлэв.