Загвар өмсөгчид залуу цагтаа л эрэлттэй, спорттой адилаар, өөрийн тухай сэтгэгдлийг үгүй хийхгүйн тулд цагаа олж карьераа дуусгах ёстой гэж ихэнх хүмүүс үлддэг. Гэхдээ сүүлийн үед ахимаг насны загвар өмсөгчид илүү алдартай болсоор байгаа юм. Загварын ертөнцөд 80 гарсан, тэр бүү хэл 90 насыг давсан хүмүүс ч ажиллаж байна. Тэдний нэг нь Гиннесийн дээд амжилтын номонд багтсан, 91 настай  Кармен Делль’Орефиче юм.

Энэ оны гуравдугаар сард карьераа дуусгаж байгаагаа мэдэгдсэн Кармен загварын салбарт 70 гаруй жил ажиллажээ. Түүнийг хамгийн урт замналтай загвар өмсөгч гэдэг бөгөөд тиймдээ ч Гиннесийн дээд амжилтын номонд бүртгэсэн аж. Гэхдээ түүний амжилтын замнал тийм ч дардан байсангүй. 

Кармены эхлэл

Нөр их хөдөлмөр, уналт босолт гээд алдартай загвар өмсөгчийн хувь тавилан амаргүй. Кармен ердөө 13 настайдаа загвар өмсөгчийн замналаа эхлүүлжээ. Гэхдээ тэр үе нь түүнд аймшигтай санагддаг байсан гэнэ. Охин өөрийгөө авьяастай эгж боддоггүйн дээр загварын ертөнц ч түүнийг нэг их татдаггүй байж. Кармен охин өлсөхгүй, ээждээ бага ч атугай туслах гэж л загварын тайзнаа алхаж, мөнгө олохоор чармайж байсан гэдэг.

Кармен ядуу гэр бүлд төржээ. Үүний дээр, охиныг өсвөр насанд байхад нь аав ээж нь салж, охин ээжтэйгээ үлдсэн аж. Аав нь хөгжимчин байсан, дэлхийгээр аялан тоглодог байсан бөгөөд нэг их чинээлэг нэгэн байгаагүй ч Кармен болон ээжид нь туслахыг хичээдэг байж. Гэвч энэ тусламж тэдний амьдралд хаана нь ч хүрдэггүй байв. Үүний дээр аавтайгаа ч уулзаж чаддаггүй, заримдаа хэдэн жилээр ч хүлээх хэрэгтэй болдог байжээ.

Кармены дурссанаар, тэр ээжийнхээ хамтаар хөлсний байр хэсэж, хэзээ ч өөрийн гэсэн ортой байж үзээгүй гэнэ. Кармен анхны ажилдаа явахдаа дугуйт тэшүүр унан явжээ. Ингэж л тэр өдөр хоногийн өл залгуулах гэж хичээж буй ээждээ туслан, хэмнэж байсан гэдэг.

Ердөө 15 настайдаа Кармены зураг  Vogue сэтгүүлийн нүүрэн дээр гарчээ. Хүмүүс үүнийг хосгүй амжилт гэж нэрлэдэг бол Кармен төдийлөн хөөрч догдолсонгүй. Кармен зурагчин ур чадваргүйн улмаас өөрийг нь эрэгтэй хүүхэд шиг харуулсан гэж буруутгадаг байж. 

Кармен загварын замналыг мөрөөдөж байгаагүй

Кармен Делль’Орефиче загвар өмсөгчийн карьер огтхон ч мөрөөдөж байсангүй. Бүх зүйл л санаандгүй болсон гэж тэрбээр ярьж байв.

"Би санамсаргүй байдлаар л загвар өмсөгч болчихсон. Үүнд нэг их гоё ганган юм байдаггүй санагддаг байлаа. Энэ бол би сайн хийж чаддаг, ээждээ багахан ч гэсэн туслахуйц мөнгө өгөх л ажил байсан" хэмээн Кармен ярьжээ.

Кармены дурссанаар, ээж нь захиалга авч, оёдлын хуучин машинаар хувцас оёдог байж. Чухамхүү эндээс л Кармен загварын талаар ойлголттой болжээ. Кармен загвар өмсөгч болоогүй байсан бол дизайнер болох байсан хэмээн дурсжээ.