Монголын Боловсролын салбарын багш, ажилтнуудын цалин хөлсийг нэмэхийг шаардсан жагсаал Сүхбаатарын талбайд үргэлжилж байна. Жагсагчид "Монголын боловсрол багшийн хомсдолд орж байна. Учир нь багш нарын цалин амьдралд үнэхээр хүрэлцэхгүй, хоосон хонох нь холгүй байна" хэмээж байлаа. Жагсаалыг Монголын боловсрол, шинжлэх ухааны үйлдвэрчний эвлэлийн холбооноос зохион байгуулж байна. 

ШУТИС Үйлдвэрчний эвлэлийн холбооны дарга С.Дэлгэрмаа 

Өнөөдөр Засгийн газраас шинэ сэргэлтийн бодлого гэх том зорилго тавиад улс орноо хөгжүүлэхийн явж байна. Гэтэл ШУТИС-ийн хувьд нэн хангалтгүй байна. Манай сургуульд багшийн орон тоо маш муу болж эхэлж байна. Өнөөдөр дэлхийн жишигт хүрье хэмээн том зорилго тавьсан атлаа авч байгаа цалин нь хаанаа ч хүрэлцэхгүй байна. Дээрээс нь өсөж байгаа инфляцын түвшин, хэрэглээний барааны үнийн өсөлтөөс болж бид гүн хямралд орлоо. 

Өнөөдөр хамгийн том хөрөнгө оруулалт бол хүний капитал. Тиймээс хүний капиталдаа хөрөнгө оруулахыг шаардаж байна. Мөн БШУЯ-ны хоёр талын хэлэлцээр байгаа. Хэлэлцээрийн заалтаа огт биелүүлэхгүй байгаа учраас бид аргагүй эрхэнд сонирхлын маргаан үүсгээд цуглаан жагсаалыг хийж байна. Цаашид мянга цэцэрлэг бариад яах юм бэ. Багш байхгүй бол тэр хүүхдүүдийг хэн ч хүмүүжүүлэхгүй. 

Шинжлэх ухааны нэгдсэн хорооны дарга Т.Баясгалан

"Шударга ёс нийгмийн баялгийн тэгш хуваарилалтаас эхэлнэ. Жирийн хөдөлмөрчин ард иргэдийг өлөн, зэлмүүн амьдруулж буй нь ямар шударга ёс вэ. Авлигач нартай тэмцэж байна гэх мэдээллээр хэн цадах юм бэ. Сүүлийн гурван жил ковидтой хамтарч төр биднийг ийм болголоо. Хамгийн бага цалинг залуу ажилчид авч байна. Тийм ч учраас тэд гадаадыг зорьж байгаа.

Эрдэм шинжилгээний ажилчдын дундаж цалин 800 орчим мянга. Тэдэнд ямар ч нэмэгдэл байдаггүй. Татвар, хураамжаа төлөөд гар дээрээ авч байгаа цалин нь амьдралд яагаад ч хүрдэггүй. Иймд цаашид ажил байгаад ч ажилтан байхгүй болох нь ээ. Энэ бүхнийг ойлгож, ухаараач. Нүд, чихгүй байдгаа болиоч ээ" гэв.

БЗД-ийн 59 дүгээр цэцэрлэгийн тогооч Х.Хэрлэн

Миний сарын цалин бол 615 мянган төгрөг. Ерөнхийдөө бол багш нарын цалин тодорхой хэмжээнд нэмэгдээд ажилчдын цалин огт нэмэгдээгүй. Одоогоор 18 дах жилдээ ажиллаж байгаа хэдий ч цалин хөлсний ямар ч нэмэгдэлгүй ажиллаж байна. Ийм цалинтай байхад нийгэмд амьдрал, ахуйгаа хэрхэн залгуулах вэ гэдэг үнэхээр хэцүү асуудал болоод байна. Тиймээс өнөөдрийн энэ жагсаал цуглаанд дуу хоолойгоороо хүргэхээр ирсэн" гэсэн юм. 

ХУД-ийн 41 дүгээр сургуулийн багш н.Хорлоо 

Цалинг 2-3 дахин нэмэгдүүлэх шаардлага тавьж байгаа юм. Өнөөдөр багш нар наад захын хэрэгцээгээ хангах боломжгүй цалин авч байна. Яамнаас цалин нэмлээ гэдэг ч амьдралд мэдэгдэх өсөлт гараагүй. Дундажаар багш 800 мянган төгрөг авдаг. Дээрээс нь цалингийн зээлтэй. Бид тодорхой үр дүнд хүрэхгүй бол ажил хаялт хийнэ. Багш нар шүүгчдээс дутахгүй цалин авах ёстой " хэмээн үзэл бодлоо илэрхийллээ.