Дайны улмаас Украины эрчим хүч, хий, дулааны дэд бүтцэд учирсан хохирол 10 тэрбум долларыг давна гэж Дэлхийн банк, НҮБ-ын Хөгжлийн хөтөлбөрийн үнэлгээнд тусгажээ. Шинжээчдийн үзэж байгаагаар, нэн шуурхай засвар хийхийн тулд 1,2 тэрбум доллар олгох ёстой гэнэ.

Тайланд өгүүлснээр, хамгийн их хохирол амссан салбар нь эрчим хүчний дэд бүтэц бөгөөд эрчим хүчний дэд бүтцийн засварт багадаа 6,5 тэрбум доллар шаардлагатай аж. Украины атомын станцуудад учирсан хохирол гэхэд л 770 сая долларт хүрчээ.

Өнөөгийн нөхцөлд оршин суугчдыг гэрэл, дулаанаар хангах ажлыг хэвийн үргэлжлүүлэх нь нэн тэргүүний зорилт болсон тул шуурхай засвар хийхэд 1,2 тэрбум доллар шаардлагатай байгаа гэнэ.

Г.Бямбасүрэн