Засгийн газрын хэрэг эрхлэх газрын дарга Д.Амарбаясгалан төрийн албыг цэгцлэх Шүүр ажиллагааны явцын талаар мэдээлэл хийлээ.

Монголын төрд 300 орчим мянган хүн ажиллаж байна. Тэдний 225 000 нь төсвөөс цалинждаг бол 75 000 орчим нь төрийн болон орон нутгийн өмчит компаниудад ажилладаг байна.

Шүүр ажиллагааны хүрээнд өнөөдрийн байдлаар 6000-8000 албан хаагчтай холбоотой асуудал хөндөгдөж байгааг Д.Амарбаясгалан сайд хэллээ. Тэрбээр “Цар тахлын хуулиар төрийн болон төрийн өмчит компаниудад томилгоо хийсэн. Цар тахлын хуулиар томилогдсон 2000 гаруй албан хаагчийг чөлөөлж байна. Тэд шаардлагатай шалгалтад хамрагдаж, хуулийн хүрээнд буцаж орох боломжтой”-г хэлэв.

Мөн тэтгэврийн насны 5000 орчим хүн төрөөс цалинжиж байгааг хэллээ. Өөрөөр хэлбэл тэтгэвэр авангаа төрд ажиллаж, цалинждаг эдгээр хүмүүсийг чөлөөлөх асуудал бас яригдана. Гэхдээ ялгаа, заагтай хийгдэхийг хэлж байна. Хүн ам багатай, боловсон хүчний хомстолтой төв суурин газар аргагүй эрхэнд аргагүй эрхэнд ажиллаж байгаа хэсэг бий. Тэтгэвэрт гарсан багш, эмч, нарийн мэргэжилтнийг төр буцаан урьж ажиллуулж байгаа тохиолдол нэлээдгүй байна. Харин онцын шаардлагагүй атлаа тэтгэвэр авангаа төрөөс цалинждаг хүмүүс Шүүр ажиллагаанд хамрагдах нь тодорхой болж байна.

 

2023 оны төсвийн хуулиар энэ оноос тэтгэвэрт гарсан хүн төсвөөс цалинжихыг хориглосон юм.

Засгийн газрын хэрэг эрхлэх газрын дарга Д.Амарбаясгалан “Засгийн газраас төрийн албанд байгаа мэргэжлийн бус, хууль бусаар томилогдсон хүмүүсийг чөлөөлж, төрийн албыг цэвэрлэхээр ажиллаж байна. Аль нэг нам, улстөрчдийн харьяанд төрийн албыг хашдаг, төрийн өмчит үйлдвэрийн газруудад ажилладаг байдлыг үүгээр таслан зогсоох ёстой. Улс төрийн сонгуулийн үр дүн яаж ч төрийн алба баталгаатай, мерит зарчимтай байх учиртай” гэсэн байр суурийг илэрхийллээ.

Төрийн албанд ажиллаж буй хүнийг чөлөөлөхдөө нэг сарын өмнө мэдэгдэх хуулийн зохицуулалттай. Өөрөөр хэлбэл Шүүр ажиллагааны хүрээнд шууд чөлөөлөх боломжгүй. Тиймээс ЗГХЭГ-аас төрийн бүх шатны удирдах албан тушаалтнуудад чөлөөлөгдөх хүмүүст 04 дүгээр сарын 06-нд багтааж мэдэгдэл хүргүүлэх үүргийг өгч, энэ тухай мэдээллээ илрүүлэхийг даалгасан юм.

Төрийн шийдвэрийг хэрэгжүүлэхдээ зориуд алдаа дутагдал бий болгож, эс үйлдэхүй гаргасан албан тушаалтантай хариуцлага тооцно гэдгийг ЗГХЭГ-ын дарга анхаарууллаа.

Б.Хэрлэн