Монгол Улс Оросын жуулчдын урсгалын өсөлтөөр нэгдүгээрт бичигдэж байгаа талаар Оросын Статистикийн газар болох Росстат байгууллагаас авсан эх сурвалжтайгаар BFM мэдээлжээ. 

Росстат байгууллагын мэдээлснээр, жилийн хугацаанд Монголыг зорих аялагчдын тоо 77 дахин өссөн байна. Оросуудын аялах дуртай бусад орнуудтай харьцуулахад энэ нь хэд дахин давсан үзүүлэлт бөгөөд оросууд олноороо зорьдог Таиланд руу сүүлийн нэг жилийн хугацаанд зорих аялагчдын тоо 12 дахин, Гүржийг зорих аялагчдын тоо долоо дахин өсжээ.

Ийм мэдээлэл гарсантай холбоотойгоор BFM Монгол руу аялал зохион байгуулдаг компанийн захирал Марина Неклюдовагаас Монгол руу хийх аяллын талаар мэдээлэл тодруулжээ. 

— Москвагаас Монгол хүрэхэд нислэгийн үнэ хэд байдаг вэ? 

— 100 мянган рубль орчим, улирал, тасалбар болон зэрэглэлээс хамаарна.

— Монголд ямар улиралд очвол тохиромжтой вэ?

— Зун. Учир нь өвөл их хүйтэн байдаг. Мөн орон нутгийн ихэнхд нь дэд бүтэц сайн хөгжөөгүй учраас зун л явахад тохиромжтой, зургадугаар сараас есдүгээр сарын эхний хооронд.

— Манай орны иргэд Монголд очоод ямар сонирхолтой зүйл үзэх боломжтой вэ? Дурсгалт газруудыг үзэхийн тулд хэд хоног явбал болох вэ?

—Аялал ихэвчлэн долоо эсвэл 10 хоног байдаг. Ихэвчлэн байгалийн үзэсгэлэнт газруудаар аялдаг юм. Улаанбаатарын ойр орчим, говь гээд л. 

— Дэд бүтэц сайтар хөгжөөгүй гэж та хэллээ. Тэнд ядаж Улаанбаатар орчимд аятайхан зам байна биз дээ? Зочид буудлууд нь ямархуу вэ?

— Зочид буудал, зам гээд Улаанбаатарт л байдаг. Улаанбаатараас гармагц замгүй, гэр буудлуудад буух болдог. Өөрөөр хэлбэл энэ нь тав тухаа золиослон адал явдал хайгч хүмүүст, идэвхтэй, байгальд амрах дуртай хүмүүсийн очих газар.

Түүний өгүүлснээр, Монголыг зорих жуулчдын тоо эрс нэмэгдсэн нь Улаанбаатараар дамжин бусад орнуудыг зорих хүмүүс олширсонтой ч холбоотой гэнэ. Өмнөд Солонгос, Япон, Сингапур, Австрали, Америкийг зорихын тулд Оросын иргэд олноор Монголыг зорьж байгаа аж.

Г.Бямбасүрэн