KFC-ийн хоолонд дуртай аялагч эр 18 жилийн туршид хамгийн амттай шарсан тахиа хайж, олон орноор аялсан бөгөөд энэ аяллынхаа дүнд хамгийн амттай хоолтой KFC-г нэрлэжээ. Энэ талаар Independent сонин мэдээлсэн байна. 

Сингапурт  маркетингийн зөвлөхөөр ажилладаг 41 настай Жеки Тан орон бүрт KFC-ийн амт өөр байдгийг мэдсэнийхээ дараа 2005 оноос эхлэн хамгийн амттай тахиа хайх эрлээ эхлүүлсэн гэнэ. Ингээд тэрбээр ажлын томилолтоор эсвэл эхнэр Мишелийн хамт аялахдаа очсон орон бүрийнхээ KFC зоогийн газраар үйлчлүүлэх болжээ.

Жеки Тан бал сарынхаа аяллын үеэр Барселона дахь KFC зоогийн газраар үйлчлүүлсэн ч тийм ч таатай сэтгэгдэл төрөөгүй гэнэ. Жеки Таны  өгүүлснээр, түүний амсаж үзсэн KFC хоолнуудаас хамгийн муу нь Испанид, дараа нь Хонконг, Австралид байдаг аж. Тэрбээр очсон орон бүртээ ижил захиалга өгч, амт, шинэлэг байдал, үнэр зэрэг нийтлэг шинжээр нь KFC-ийн хоолыг эрэмбэлжээ. Жеки Тан 18 жилийн хугацаанд дэлхийн 38 орны 1000 гаруй  KFC-ийн зоогийн газраар үйлчлүүлсэн гэнэ.

Түүний өгүүлснээр, энэ олон зоогийн газар дунд өрсөлдөгч олон байсан ч Монголынх хамгийн сайн нь байсан аж. Хэдийгээр захиалсан хоолоо авах гэж дараалалд цаг орчим зогссон ч энэ нь дэмий хүлээлт байгаагүй гэж тэрбээр Independent сонины сурвалжлагчид ярьвжээ.

"Би 2013 онд ажлаар Монголд очихдоо Улаанбаатар хотод байх KFC-ийн зоогийн газарт хооллосон. Тухайн үед энэ зоогийн газар дөнгөж нээгдсэн, хүн их байсан учраас бид цаг орчим хүлээх хэрэгтэй болсон юм. Гэхдээ ингэж хүлээсний хэрэг гарсан. Би шарсан тахиаг ямар амттай, хэр шинэ, гаднах нь шаржигнаж байгаа эсэх, бас ямар үнэртэй байгаагаар нь үнэлдэг. Монголд идсэн шарсан тахиа энэ бүх үзүүлэлтэд нийцэж байсан. Үнэхээр гайхалтай" хэмээн Жеки Тан ярьжээ. 

Түүний өгүүлснээр, Монголын дараа тахианы амт чанараараа Кейптауны KFC ордог гэнэ.

"Өмнөд Африк дахь KFC зоогийн газар нь уул руу харсан байрлалтайгаараа хамгийн шилдэг байршилтайд тооцогдоно. Тэдний тахиа нь ч гоё. Гэхдээ Монголыг гүйцэхгүй" хэмээн Жеки Тан өгүүлжээ.

Түүний эрэмбэлснээр, шилдэг зоогийн газрын эхний аравт Монгол, Өмнөд Африкаас гадна Шри-Ланка, Индонези, Малайз, Таиланд, Сингапур, Чили, Филиппин, Өмнөд Солонгос орох аж. 

Г.Бямбасүрэн