Монголд хүмүүсийн өдөр тутмын хэрэглээнд өргөн нэвтэрсэн Максим кофенд гадны хольц илэрсэнтэй холбоотой шалгалтын ажил Өмнөд Солонгост дууссан талаар hani.co.kr цахим хуудас мэдээлжээ. 

"Чанвон дахь Dongseo Food үйлдвэрт дөрөвдүгээр сарын 3, 4-ний өдрүүдэд шалгалт явуулахад үйлдвэрийн төхөөрөмж дээр силикон уут кофе бутлагч руу орж, бутлагдан, улмаар кофены орцтой холилдсон нь тогтоогдсон" гэж Хүнсний бүтээгдэхүүн, эм бэлдмэлийн аюулгүй байдлын яам мэдэгджээ. Ингээд 50-280 ширхэгээр савлагдан хэрэглэгчийн гар дээр очдог "Maxim Mocha Gold Mild Coffe Mix" кофены найман төрлийн бүтээгдэхүүнд нунтаг силикон орсон нь тогтоогдсон байна.

Үйлдвэрийн алдаа гарч, гадны хольц агуулсан 273 276 килограм кофены хольцын зарим хэсэг нь хэдийнэ худалдааны цэгүүдэд хүрсэн байна. Улмаар Максим кофе үйлдвэрлэгч компанийг бүтээгдэхүүнээ зах зээлээс эргүүлэн татахыг үүрэг болгожээ. 

Өмнөд Солонгосын Хүнсний бүтээгдэхүүн, эм бэлдмэлийн аюулгүй байдлын яамны мэдэгдсэнээр, силиконы хольц нь хүний биед шингэдэггүй гадагшилдаг учраас эрүүл мэндэд аюул учруулах эрсдэл бага гэнэ.

Силикон нь уян хатан чанараараа резинээс илүү байдаг, нийлэг аргаар гаргаж авсан материал юм. Энэ материалыг ахуйн бараа үйлдвэрлэх, гоо сайхны мэс засал, хүүхдийн тоглоом, сав баглаа үйлдвэрлэхэд ашигладаг юм. 

Г.Бямбасүрэн