Монголын хууль хяналтын байгууллагынхан Т.Бадамжунайг албадан эх оронд нь авчирлаа. АТГ-аас түүнд баривчлах шүүхийн тогтоолыг танилцуулж, нисэх буудлаас авч явлаа. Түүнийг цагдан хорих, таслан сэргийлэх арга хэмжээ авах эсэхийг мөрдөх байгууллага шийдэх аж.

Түүнийг албадан авчрах процесс хэрхэн явагдсан талаар Хуульзүй, дотоод хэргийн сайд Х.Нямбаатар мэдээлэл өглөө.

Тэрбээр “Бид БНСУ-д хуралдсан Энэтхэг, Номхон далайн бүсийн ардчиллын II уулзалтад оролцсон. Энэ хурал  авлигатай тэмцэх чиглэлээр улс орнуудын хамтын ажиллагааг нэмэгдүүлэх, харилцан туслалцаа дэмжлэг үзүүлэх чиглэлээр болсон.

Энэ үеэр тухайн хуралд оролцсон улс орнуудын Гадаад хэргийн болон хуульзүйн сайд нарын түвшинд харилцан дэмжлэг үзүүлэх уулзалтууд болсон. Мөн манай бүрэлдэхүүн хэд хэдэн улсын хууль сахиулах байгууллагын удирдлагуудтай эрхзүйн талаар харилцан туслалцаа үзүүлэх чиглэлээр ярилцсан.

Үүний дараа бид Филиппин улсад очиж, тус улсын хууль сахиулах байгууллагын удирдлагуудтай уулзаж, эрхзүйн талаар харилцан туслалцах бичгийг гардуулсан. Иргэн Т.Бадамжунайгийн гадаад паспортыг хүчингүй болгосон, дансыг нь царцаах шийдвэр гарсан, түүнийг Монгол Улсад шилжүүлэн өгөхийг хүссэн утгатай албан бичгүүдийг гардуулсан. Үүний дараа Филиппин улсын хууль сахиулах байгууллагуудын зүгээс Т.Бадамжунайг албадан саатуулсан. Албадан саатуулах процесс 10 гаруй цаг үргэлжилсэн.

Иргэн Т.Бадамжунай албадан гарахаас татгалзах зүйлгүй, Монгол руу явах хүсэлтэй байгаагаа илэрхийлсэн. Энэ дагуу процессын нэлээд урт ажлууд явагдсан. Ингээд бид өчигдөр шөнийн 01 цаг нислэгээр Сөүлээр дамжиж, сая Улаанбаатарт буулаа" гэсэн мэдээллийг өглөө.