Нью-Йорк дахь Манхэттены эрүүгийн шүүх АНУ-ын Ерөнхийлөгч асан Дональд Трампыг порно жүжигчин Сторми Дэниэлсд мөнгө төлсөн хэргээр санхүүгийн залиланд буруутгажээ. Түүнийг нийт 34 зүйл ангиар буруутгасан талаар олон улсын хэвлэлүүд мэдээлсэн байна.

ВВС агентлагийн мэдээлснээр, шүүхэд ирснийхээ дараа Трампыг саатуулсан байна. Түүнийг саатуулан хорьсон нь энэ төрлийн хэрэг дээр авч хэрэгжүүлдэг журмын дагуух арга хэмжээ бөгөөд баривчлан саатуулах үед сэжигтэнд гав зүүж, эрхийг нь хэлж өгдөг ч Ерөнхийлөгч асан Трампыг гавлаагүй аж. Мөн сэжигтнийг саатуулан хорихын өмнө гарын хээг нь авч, хавтаст хэрэгт хавсаргах гэрэл зургийг нь авдаг, харин Трампыг баривчлах үеэр ийм ажиллагаа явагдсан эсэх талаар сэтгүүлчид Трампын өмгөөлөгчөөс асуухад тэрбээр хариулахаас татгалзжээ. 

Шүүх дээр ирснээсээ хойш хагас цагийн дараа Трамп сонсгол болсон 15 давхар руу гарч, дахин нэг цагийн дараа шүүхийн танхимыг орхиж, Флорида дахь Мар-а-Лаг,о эдлэн рүүгээ явжээ. Тэрбээр шүүхэд ирэхээсээ өмнөхөн Truth Social хэмээх өөрийн олон нийтийн сүлжээнд товч мэдэгдэл хийсэн байна.

"Доод Манхэттен рүү, шүүхийн танхим руу явж байна. Гайхалтай, тэд намайг баривчлах гэж байна. Энэ бүхэн Америкт болж байгаа гэдэгт итгэх аргагүй нь" хэмээн Трамп бичжээ.

Трампад үүсгэсэн хэрэг 

Трампыг 34 зүйл ангиар  буруутгасан ч дөрөвдүгээр сарын өдрөвний өдөр болсон шүүх хурал дээр Трамп гэм буруугаа хүлээхээс татгалзсан гэж DW мэдээлсэн байна. 

Ийнхүү тэрбээр шүүхийн өмнө нь зогссон нь АНУ-ын түүхэнд Ерөнхийлөгч асныг эрүүгийн гэмт хэрэгт буруутгаж байгаа анхны тохиолдол юм. Трампыг 2015 оны наймдугаар сараас 2017 оны 12 дугаар сарын хооронд ""өөрийнх нь тухай сөрөг мэдээллийг нийтлэгдэхээс сэргийлэх зорилгоор мэдээллийг "худалдан авах" замаар 2016 оны ерөнхийлөгчийн сонгуульд нөлөөлөхийн тулд бусад этгээдүүдтэй хамтран үгсэн хуйвалдсан" хэмээн буруутгаж байгаа аж. Мөн энэ үйлдлээ нуун дарагдуулахын тулд "албаны баримт бичигт хуурамч бичилт хийсэн" гэж буруутгажээ. 

Түүнийг буруутгаж буй гол хэргүүдийн нэг нь порно жүжигчин Сторми Дэниелсд мөнгө төлсөн гэх хэрэг юм. Яллах дүгнэлтэд зааснаар, Ерөнхийлөгчийн сонгуулийн өмнөхөн Дэниэлс Дональд Трамптай амрагийн харилцаанд орсон гэдгийг бусдад яриулахгүйн тулд түүнд 130 мянган доллар төлжээ.

Өөрийнх нь эсрэг эрүүгийн хэрэг үүсгэсэн нь 2024 оны сонгуульд оролцох гэж байгаатай нь холбоотойгоор "улс төрийн мөрдлөгө" хийж байгаа хэрэг хэмээн Трамп үзэж байгаа аж. Түүний эсрэг дараагийн шүүх хурал 12 дугаар сарын дөрвөнд болох товтой байна. Үүнээс өмнө Трампын өмгөөлөгчдийн өргөдлийг авч хэлэлцэх хурлууд болох аж. Шүүхээс Трампыг гэм буруутай гэж үзвэл дөрөв хүртэлх жилийн ял оноож болзошгүй юм байна. 

Г.Бямбасүрэн