Оросын Воронеж хотын 19 давхар орон сууцны хамгийн дээд давхраас нэгэн эр унажээ. Тэрбээр өндрөөс унаад амьд үлдээд зогсохгүй, түргэн тусламжийн эмч нарт дуу дуулж өгсөн талаар Newizv мэдээлсэн байна. 

Энэ хэрэг дөрөвдүгээр сарын гуравны үдэш болжээ. Нисгэгч Колесниченкогийн нэрэмжит гудамжны 65 дугаар байрны 19 давхраас 40 настай эр унаж, байрны гадаа зогсоосон Nissan X-Trail машин дээр унаж амьд гарсан гэнэ. 

SHOT Телеграм сувгийн бичсэнээр, 40 настай эр согтуу байсан аж. Түүнийг дээвэр нь эвдэрсэн машинаас аврагчид гаргасан байна. Харин эмнэлгийн дамнуурга руу согтуу эр өөрөө алхаж очжээ. Тэрбээр амьд үлдээд зогсохгүй эмч нарт Алла Пугачевагийн дуулдаг "Зүүд шиг хайр" дууг дуулж өгсөн гэнэ.

Г.Бямбасүрэн