Ардчилсан нам, хүний эрх, эрх чөлөө, үг хэлэх үзэл бодлоо илэрхийлэх, шүүхийн шудрага бус алагчилсан шийдвэр, зүй бус үйлдлийг жигшин, эсэргүүцэж “НЭЭЛТТЭЙ МИКРОФОН” чөлөөт индэрийг ардчилсан үзэл санааг хамгаалагч мянга мянган иргэд, залуу үеийнхэний дуу хоолойг нийгэмд хүргэх зорилгоор өдөр бүр 11:00-13:00 цагийн хооронд зохион байгуулж буй. 

Энэ хүрээнд өнөөдөр Ардчилсан залуучуудын холбооноос УИХ дахь Ардчилсан намын бүлэгт шаардлага хүргүүлж байгаа мэдэгдэж, хэлмэгдэгсдийн хөшөөний хажууд эсэргүүцлээ илэрхийллээ. Тэдний зүгээс мөн Монголхүү, Д.Мөнх-Эрдэнэ нарыг цагдан хорьсонтой холбогдуулан МУ-ын Ерөнхийлөгч У.Хүрэлсүхэд ил захидал хүргүүлж байгаа аж.

Энэ үеэр МУГЖ Д.Сосорбарам "Энэ цахим гавыг ямар шугамаар хаанаас, хичнээн тэрбум төгрөгөөр оруулж ирсэн юм бэ? Батерей нь амархан муудчихдаг энэ гавыг хэн гэдэг хүн оруулж ирж байгааг УИХ дахь Ардчилсан намын бүлэг шаардаад гаргаад ир. Цахим гавын тайланг тавь. Ардын нам Ардчилсан намынханд хэлэхэд та нар хүнийг айлгаж удирдана гэвэл гонжийнжоо. Та нараас айдаг хүн байхгүй. Өнөөдөр Д.Мөнх-Эрдэнэ, Д.Монголхүүг, Ц.Хуланг хорьсон. Маргааш чамайг хорино. Ц.Хулан тагнуул хийнэ гэж юу байх вэ?" хэмээлээ. 

Мөн энэ үеэр Ардчилсан залуучуудын холбооноос УИХ дахь Ардчилсан намын бүлгийн гишүүдийг сөрөг хүчний үүргээ биелүүлж, хүний эрх эрх чөлөөг хамгаалахыг шаардлаа. Тус холбооны залуус маргааш "НЭЭЛТТЭЙ МИКРОФОН” чөлөөт индэрийн үйл ажиллагаагаа С.Зориг агсны хөшөөний дэргэдээс үргэлжлүүлэх юм. 

П.ГОО