Тайванийн тэргүүн Цай Инвэнь АНУ-д айлчилж байгаа. Түүнийг энэ айлчлалынх нь үеэр АНУ-ын Төлөөлөгчдийн танхимын дарга хүлээн авч уулзахаар болсон талаар Ройтерс агентлаг мэдээлжээ. 

Эх сурвалжийн мэдээлснээр, дөрөвдүгээр сарын тавны өдөр АНУ-ын Төлөөлөгчдийн танхимын дарга Кевин Маккарти Калифорни дахь Ерөнхийдөгч Рональд Рейганы номын санд Тайванийн тэргүүн Цай Инвэнийг хүлээн авч уулзах юм байна. Энэ уулзалтад хоёр намын төлөөлөгчид оролцох бөгөөд харин уулзалтын үеэр яригдах сэдвийн талаарх мэдээлэл гараагүй аж. 

Цай Инвэнь Төв Америкийн орнууд болох Гватемала, Белиз рүү явах замдаа АНУ-д саатсан юм. Тэрбээр эдгээр орнуудаас буцахдаа Калифорни мужийн Лос-Анжелес хотоор дайрах аж.

Энэ айлчлалын талаарх мэдээлэл гарсан даруйд БНХАУ Цай Инвэнийг Америкийн албан тушаалтнуудтай уулзвал хариу арга хэмжээ авна хэмээн сүрдүүлж байв. Үүний хариуд АНУ Тайванийн тэргүүний ажлын айлчлалыг арлын орны эсрэг түрэмгийлэх шалтаг болгон ашиглахгүй байхыг уриалсан юм. БНХАУ Тайванийг өөрийн нэг муж гэж үздэг тул Тайваньтай харилцсан аливаа харилцааг тусгаар тогтнолд заналхийлсэн, салан тусгаарлах ажиллагааг дэмжсэн хэрэг гэж үздэг. Тиймдээ ч өнгөрсөн оны наймдугаар сард тухайн үеийн Төлөөлөгчдийн танхимын дарга Нэнси Пелоси Тайваньд айлчилсны улмаас БНХАУ, АНУ, Тайванийн харилцаа эрс хурцадсан юм. 

Г.Бямбасүрэн