Оросын Брянск мужийн Севск хотод  нисэгчгүй нисэх аппарат цэргийн комиссарын газрын байр руу халдсан талаар мужийн захирагч Александр Богомаз мэдээлжээ.

Түүний өгүүлснээр, даваа гарагийн үдэш дроны халдлагын улмаас барилгад эвдрэл гэмтэл гарсан ч хүн гэмтэж бэртээгүй аж. Одоо хэргийн газарт тусгай албаныхан ажиллаж байгаа гэнэ. Түүнчлэн энэ үйл явдлын дараа өөр нэг дрон Дотоод Хэргийн яамны газрын барилгын ойролцоо тэсрэх төхөөрөмж хаяжээ. Эдгээр дронууд нь Украины Зэвсэгт хүчнийх гэж Богомаз үзэж байгаа аж. Севск хот нь Украины хилээс 50 км орчим зайд байдаг юм. 

Орос Украин руу түрэмгийлснээс хойш байлдааны ажиллагааны бүстэй хиллэж буй Оросын бүс нутгуудад нөхцөл байдал хурцдаж байгаа талаарх мэдээлэл байнга гарах болсон. Брянск, Белгород, Курск мужуудын эрх баригчид Украины талаас буудсан гэж удаа дараа мэдэгдэж байв. Харин Украины тал энэ мэдээлэлд ямар нэг тайлбар өгдөггүй юм.

Г.Бямбасүрэн