ОХУ-ын Ерөнхийлөгч Владимир Путин Украинд болсон 2014 оны улс төрийн хямралын дараа салан тусгаарласан Донбассын тусгаар тогтнолыг хүлээн зөвшөөрч, улмаар энэ бүс нутгийг хамгаалах нэрийн дор Украины эсрэг "цэргийн тусгай ажиллагаа" явуулах тушаалыг 2022 оны хоёрдугаар сарын 24-ний өдөр өгснөөр өнөөгийн дайн дэгдсэн юм. Энэ хугацаанд дэлхий нийт Украиныг дэмжиж, төрөл бүрийн тусламж үзүүлж, харин ОХУ хоригт орон, эдийн засгаараа боомилуулахын зэрэгцээ арми нь ихээхэн хохирол амсаж байгаа ч дайныг дуусгах бодолгүй байгаа нь өнөөгийн үйл явдлаас харагдаж байна. Путин төрийн эрхэнд байгаа цагт тэр ялахаас нааш дайн дуусгахыг хүсэхгүй, гэхдээ дотоодод нь эргэлт гарч, Путинийг түлхэн унагаж магадгүй гэсэн байр суурийг барууны орнуудын тагнуулч, шинжээчид илэрхийлсээр байгаа юм. Энэ удаад ийм байр суурийг АНУ-ын Тагнуулын ерөнхий газрын сөрөх тагнуулын дарга асан Жеймс Олсон илэрхийлжээ. 

Украинд Оросын арми удаа дараа бүтэлгүйтсний улмаас генералууд, олигархууд болон тусгай албадын төлөөлөгчид цэргийн эргэлт хийж, ОХУ-ын Ерөнхийлөгч Владимир Путинийг түлхэн унагаж магадгүй гэж Жеймс Олсон The Sun сонинд ярилцлага өгөх үеэрээ өгүүлжээ. Америкийн тусгай албанд гучин жил ажилласан Олсоны үзэж байгаагаар, Путин арми болон армийн удирдлагыг хэтрүүлэн үнэлснээр өдгөө дайнд ялах боломж бага, ялалтгүйгээр эрх мэдлээ хадгалж үлдэж чадахгүй гэсэн мухардалд орчхоод байгаа гэнэ. 

"Путин төрийн эрхэнд үлдвэл дайн сунжирна, учир нь тэр бууж өгөхгүй. Гэхдээ Путин төрийн эрхэнд үлдэнэ гэж би бодохгүй байна. Түүнийг түлхэн унагах байх" хэмээн Олсон өгүүлээд Оросын ерөнхийлөгчийг хөнөөж магадгүй гэсэн хувилбарыг үгүйсгэхгүй хэмээжээ.

Украинд амссан Оросын арми хохирол нэмэгдэж, Афганистаны дайны үеийн хохирлоос 10 дахин их болсон гэж Олсон өгүүлсэн байна. Түүний өгүүлснээр, Зөвлөлтийн үед Афганистан руу довтолсон нь ихээхэн хохирлл дагуулж, армийн хувьд бүтэлгүйтлээр төгсөн, ЗХУ-ыг задран унах эхлэлийг тавьсан аж.

"Хүмүүсийн амь насыг эмгэнэлтэйгээр үрж байгаад ихээхэн дургүйцэх генералууд байгаа байх. тэд Путиний эсрэг бослогыг санаачилж мэдэх юм" хэмээн Жеймс Олсон өгүүлжээ.

Ийм тохиолдолд Путинийг "амьд үхдэл"-д тооцож болно, учир нь элитийн хүрээний бусад төлөөлөгчид ч нэгдэж болзошгүй цэргийн бослогыг тэр даван гарч чадахгүй гэж Олсон үзэж байгаа аж.

"Арми, тусгай албад дотор болон олигархиудын дунд Путинийг эсэргүүцдэг хүчтэй далд эсэргүүцэгчид байгаа гэж би болож байна" хэмээн Олсон өгүүлээд, Путинийг "устгасан"-ы дараа Украин дахь дайн нэн даруй зогсоно гэж онцолжээ.

Энд дуулгахад, өдгөө 70 настай Путин 2000 онд Ерөнхийлөгч болсон бөгөөд тэрбээр Иосиф Сталины үеэс хойш Оросын төрийн эрхийг хамгийн удаан барьж байгаа хүн болсон юм. Мөн Оросын Үндсэн хуульд өөрчлөлт оруулснаар 2036 он хүртэл төрийн тэргүүний албан тушаалд үлдэх боломжтой болсон. 2024 онд болох Ерөнхийлөгчийн сонгуульд Кремль хэдийнэ бэлдэж эхэлсэн бөгөөд урьд энэ сонгуульд Путин өмнөх сонгуулиудаар авсан саналаас ч илүү олон саналыг авах хүсэлтэй байгаа гэж нөхцөл байдалтай ойр эх сурвалжууд РБК агентлагт ярьжээ. Эх сурвалжуудын өгүүлснээр, мужуудын захирагч нарт сонгуулийн ирцийг 70 хувьтай, харин "гол нэр дэвшигч" буюу Путиний төлөө өгөх саналыг 75 хувьтай байлгах үүрэг өгсөн гэнэ. 2018 оны сонгуулиар ирц 67,54 хувь, Путиний авсан санал 76,69 хувь гэж Оросын Сонгуулийн төв хороо мэдэгдэж байв.

Г.Бямбасүрэн