Өмнөд Солонгос, АНУ-ын Тэнгисийн цэргийн хүчин болон Японы батлан хамгаалахын Тэнгисийн хүчин хамтран цэргийн сургуулилалт хийхээр болжээ. Хоёр өдөр үргэлжлэх энэ сургуулилалтад нисэх онгоц тээвэрлэгч олролцож, шумбагч онгоцтой дайтах, тэнгист осол гарсан үед эрэн хайх ажил зохион байгуулах дадлага хийнэ гэж Өмнөд Солонгосын Үндэсний батлан хамгаалах яам мэдэгдсэнийг KBS дамжуулсан байна.

Эх сурвалжийн мэдээлснээр, дөрөвдүгээр сарын гурван, дөрөвний өдрүүдэд Чэжүгээс өмнөд хэсэгт гурван талт тэнгисийн цэргийн сургуулилалт болох аж. Энэ сургуулилалтыг АНУ-ын Тэнгисийн цэргийн хүчний 11 дүгээр агаарын цохилтын бүлгийн командлагч Кристофер Суини удирдах юм байна.

Өмнөд Солонгосын талаар "Юльгок Ли И", "Чхве Ён", "Тэ Чжо Ён", Америкийн талаас хоёр хөлөг онгоц, Японы талаас нэг хөлөг онгоц оролцох аж. Хамгийн сүүлд энэ гурван орон 2022 оны есдүгээр сард хамтарсан сургуулилалт хийж байсан юм. 

Г.Бямбасүрэн